Дмитрий Садовников: «Анал сөмөлүөт Өлүөхүмэҕэ ардаҕы түһэрдэ»

Бөлөххө киир:

Билиҥҥи туругунан, Саха сиригэр ойуур баһаарын балаһыанньата уустук,  171 баһаар күөх дуолу мэҥиэстэр. Ардаҕа суох күннэр турбуттарыттан эбии 15 ойуур баһаара эбиллибит. Ол иһин бэҕэһээ  анал сөмөлүөт  Өлүөхүмэ улууһун халлааныгар үлэлээн,  ардаҕы түһэрэри ситистэ.

СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников иһитиннэрбитинэн,  бүгүн өрөспүүбүлүкэ сиригэр-уотугар 171 ойуур баһаара умайарыттан 58-гар умуруоруу үлэтэ ыытыллар. 2402 киһи уонна 301 тиэхиньикэ үлэлиир. Суукка иһигэр 11 ойуур баһаара бохсуллубут, 8 умуруоруллубут. Аһара курааннаан уонна тыалтан сылтаан 15 ойуур баһаара эбиллибит.  Көтөр ааллар Кэбээйи уонна Хаҥалас улуустарыгар үлэлээтилэр. Хаҥалас уонна  Уус Алдан улуустарыгар турбут баһаардар үрдүлэригэр ууну куттулар уонна анал биригээдэлэри тиэртилэр. Хомойуох иһин, улахан кыамталаах БЕ-200  уонна  Ил-76 сөмөлүөттэр буруо элбэҕиттэн сылтаан үлэлээбэтилэр.

Дмитрий Садовников итини тэҥэ АН-26  сөмөлүөт  (зондировщик)  Өлүөхүмэ улууһугар үлэлээбитин түмүгэр, ардах түһэн саҕалаабытын иһитиннэрдэ. Бүгүн анал көтөр аал өссө да Өлүөхүмэҕэ  уонна кыалыннаҕына,  Хаҥаласка үлэлиэҕэ.   Бу сөмөлүөт көдьүүһэ  сөптөөх былыттар суохтарыттан мөлтөөн иһэрэ биллэр.  Баҕа өттүнэн үлэлээччилэр ыстааптара  Кэбээйи уонна Горнай улуустарыгар анал этэрээттэри хомуйан көмөҕө ыыттылар.

+1
0
+1
0
+1
0
+1
0
+1
0
+1
0
+1
0