«Саха» НКИХ, «Якутия 24» телеханаалларынан, «Тэтим» араадьыйанан СӨ Бырабыыталыстыбата 2021 сыллааҕы үлэтин нэһилиэнньэҕэ сырдаталлар.
СӨ бастакы вице-премьерэ Дмитрий Садовников 2021 сылга туох үлэ ыытыллыбытын, инники өттүгэр туох былаан баарын билиһиннэрдэ, ону сэргэ, Саха сирин олохтоохторун ыйытыыларыгар хоруйдары биэрдэ.
Кини коронавирус, ойуур баһаардара төһө да харгыстаабыттарын иһин, үлэҕэ-хамнаска балачча ситиһиилэр баалларын бэлиэтээтэ.
—2021 сыллаахха СӨ Бырабыыталыстыбатын Бэрэссэдээтэлин бастакы солбуйааччы дуоһунаһыгар анаммытым. Судургута суох сыл ааста. Бу бастатан туран, биһигини тургутан көрбүт ойуур баһаардарын кытары сибээстээх. Туохха болҕомтону уурарбытын, тугу чопчулуурбутун сэргэ, федеральнай киинтэн эбии үп көрүллүннэ, — диэтэ Садовников.
2021 сылга ситиһиилэринэн Садовников, бастатан, суол өрөмүөнүн уонна саҥалыы уларытан оҥорууну бэлиэтээтэ. Ол курдук, ааспыт сылга 500 км тахса уһуннаах айан суола тутуллан үлэҕэ киирдэ. Ол иһигэр 183 км федеральнай суол, 231 км уһуннаах эрэгийиэннээҕи суол. Маны таһынан, биэс оройуоҥҥа 11 муоста тутулунна.
Суол-иис боппуруоһугар эбэн эттэххэ, “Куттала суох айан суола” национальнай бырайыак сүнньүнэн 48 км уһуннаах куорат иһинээҕи суол үлэҕэ киллэрилиннэ. Дьокуускай куораттан Хатырык сэлиэнньэтигэр диэри “Нам” айан суолун учаастага аспаалланна. Кылгас болдьох иһигэр Горнай улууһун Бэс Күөлүгэр суоллара чөлгө түһэрилиннэ.
—Бары салааларга коронавирустан хааччахтааһыннар, ойуур баһаардара харгыстары үөскэппиттэрин да иһин, суол-иис өрөмүөнэ, саҥалыы уларытыллан оҥоһуу ситиһилиннэ. Муосталар тутулуннулар. Биллэн турар, бу сайдыы уонна дьоҥҥо-сэргэҕэ табыгастаах. Бу салааны биһиги өйүүбүт уонна өйүөхпүт. Онуоха хамаандабыт 2022 сылга улахан сыалы-соругу туруорунар. Ол сыалы-соругу ситиһиэхпит дии саныыбыт«, — диир кини.
Маны сэргэ, бастакы вице-премьер күүстээх үлэ ыытыллан, сааскы халаан былырыын этэҥҥэ ааспытын эттэ, ОДьКХ үлэһиттэригэр, энергетиктэргэ кыһыны бэлэмнээх көрсүбүттэригэр махтанна, кыһамньылаах үлэлэрин бэлиэтээтэ.
Дмитрий Садовников 2022 сылга туох үлэ-хамнас күүтэрин эмиэ сырдатта.
—Улахан бэлиэ сыл үүннэ. Саха АССР 100 сыла. СӨ Ил Дархана биһиги иннибитигэр улахан соруктары туруорда, олору толоруох тустаахпыт. Сааскы халаан, ойуур баһаардарын боппуруостара, итиэннэ биллэн турар национальнай бырайыактары толоруу болҕомто киинигэр сылдьаллар, — диэтэ.
Быһа биэрии кэмигэр уопсайа 127 ыйытыы киирдэ. Отчуот кыттыылаахтара 20 ыйытыыга хоруйдаатылар. Хаалбыт ыйытыылары хаалларбакка, хоруйдары биэриэхтэрэ. Бүгүҥҥү күҥҥэ дьон-сэргэ ордук ОДьКХ бопуруостарын, ойуур баһаардарын бохсууга туох бэлэмнэнии үлэлэр ыытыллалларын, тутууну, тулалыыр эйгэ харыстабылыгар үлэни, суол оҥоһуутун, о.д.а. токкоолоһон ыйыттылар.
Санатан эттэххэ, СӨ Бырабыыталыстыбатын үлэтин отчуота коронавирус дьаҥынан сибээстээн онлайн-киэбинэн ыытыллар. Отчуот кыраапыгын бу ссылканан киириэн көрүөххүтүн сөп.
Хаартыскаҕа Мария Васильева (СИА) түһэриилэрэ
