Суруналыыс Дмитрий Аргунов уонна Бүтүн Арассыыйатааҕы “За Россию” норуот фронун уопсастыбаннай хамсааһынын Саха сиринээҕи хос бэрэссэдээтэлэ Дмитрий Паньков Украинаҕа буола турар анал эпэрээссийэ туһунан кэпсэттилэр.
— Украинаттан төрүттээх аймахтардааххын дуо?
— Үгүс Саха сирин олохтоохторун аймахтара Украинаҕа бааллар. Ааспыт сайын үлэм сүнньүнэн Нерюнгригэ тиийэ сылдьыбытым. Айаным кэмигэр пуойаска Украинаттан төрүттээх саас ортолоох дьахтары көрсүбүтүм. Онно кини кэпсээн турардаах, эдэр сааһыгар, өссө сэбиэскэй кэм саҕана Молдоваттан Львов куоракка тахсан иһэн билиэт атыылаһаары гыммытыгар, киниэхэ Украина тылынан саҥарбатаҕын иһин билиэт атыылаабатахтар. Онуоха хайа эрэ эр киһи киниэхэ билиэт атыылаһарыгар көмөлөспүт уонна: «Эйиэхэ манна ыстакаан да ууну биэриэхтэрэ суоҕа», — диэбит. Санааҥ көрүҥ, ити Сэбиэскэй Сойуус муҥутаан ситэн турар кэмигэр, кистээн национализм саһа сылдьыбыт буолуон сөп. Ити түмүгэ билигин тахсар буоллаҕа. Ол түмүгэр нэһилиэнньэ эрэйдэнэр.
— Эн собэрэссэдээтэлинэн үлэлиигин. Эн санааҕар мобилизация хайдах көстүөхтээҕий?
— Мобилизация, хомуур туһунан боппуруостары дойдубут дьаһалтата эрэ быһаарар кыахтаах. Оттон уопсай мобилизация диэн өйдөбүл туһунан этэр буоллахха, бу бастатан туран, биһиги өйбүтүгэр-санаабытыгар үөскүөхтээх. Дьон билигин ити Украинаҕа буола турар быһыыны-майгыны ханна эрэ ыраах буола турарын курдук саныыр. Билигин социальнай ситимнэр нөҥүө араас фейк тарҕанар. Зеленскэй этэр дии, АХШ көмөтө суох Украина сатаан сэриилэһэр кыаҕа суох диэн.
Уопсайынан, мобилизация диэҥҥэ биһиги өй-санаа өттүнэн бэлэм уонна түмсүүлээх буолуохпутун наада. Ол курдук холобур ГТО төннөн эрэрэ эмиэ улахан суолталаах. Үлэҕэ уонна көмүскэнэргэ бэлэммит диэн суолталаах. Биһиги барытыгар бэлэм буолуохтаахпыт.
— Аҕа дойду сэриитин саҕана норуот күүһүнэн көмө хомуйуллара. Билигин эһиги ыытар аахсыйаларгыт туох соруктаахтарый?
— Аахсыйабыт сүрүн соруга – барыта кыайыы туһугар буолар. Ким туох кыахтааҕынан көмө хомуйуллар. Ол курдук үп-харчы, таҥас-сап, цифровой тиэхиньикэ хомуйан барытын Москваҕа ыытабыт. Оттон сайтка үбүнэн көмө хомуйуллар. Саха сиригэр бүтүн кэллэктииптэр маннык көмөлөрү оҥордулар. Ити хайҕаллаах суол буолар.
— Дьиэттэн баһыылка… үтүө холобур буолан норуот түмсүүтүн көрдөрөр буоллаҕа.
— Ким да кистээбэт. Геноциды кытта киирсии бара турар. Судаарыстыба бэйэтин олохтоохторун, дьонун-сэргэтин көмүскүүр. Дьону көмүскүүр иһин байыаннай эпэрээссийэ бара турар. Арассыыйа көмүскүүр бырааптаах. Бу глобальнай улахан бэлиитикэ буолар. Арассыыйа уонна Украина иирсээнигэр Евросойуус тиэхиньикэтэ сэриилэһэр. Евросойуус бэйэтин тиэхиньикэтин, сэбилэниитин бу киирсиигэ тургута сылдьар. Манна наймылаһан араас дойду дьон-сэргэтэ барыта кытта сылдьар. Киһи дьиксинэрэ, манна кыттыбыт дьон хара ырыынактан сэп-сэбиргэл атыылаһан тугу баҕарар оҥоруох курдук. Ол иһин этэбин, өй-санаа өттүнэн түмсүүлээх уонна сааһыламмыт буолуохтаахпыт.