Бүгүн Арассыыйа Бырабыыталыстыбатын Бэрэссэдээтэлэ Дмитрий Медведев төрөөбүт күнэ. Дмитрий Анатольевич Саха сиригэр, араас дуоһунастарга үлэлии сылдьан, түөртэ кэлэ сылдьыбыта. Кини сырыыларын туһунан хаартысканан кэпсиэхпит.
2008 сыл, олунньу 6 күнэ. Аан бастакытын Арассыыйа Бырабыыталыстыбатын Бэрэссэдээтэлин бастакы солбуйааччытын дуоһунаһыгар үлэлии сылдьан, Мииринэй оройуонугар кэлэ сылдьыбыта. Светлай бөһүөлэккэ хас да сыл устата уһуннук тутуллубут ГЭС үһүс блогын аһыллыытыгар кыттыбыта. Кини анал кунуопканы баттаан, үрдүк күүрүүлээх уот алмааһы хостуур тэрилтэлэргэ уонна Мииринэй оройуонун олохтоохторугар бэриллибитэ.
Ол кэнниттэн олохтоох индустриальнай техникум үлэтин кытта билсибитэ. Ити кэмҥэ оруобуна уот баран хаалбыта. Онуоха Дмитрий Анатольевич: “Үһүс энергблогу үлэҕэ киллэрбиппитин да үрдүнэн, техникумҥа уот баран хаалла. Ол аата бу кыһалҕа оройуоҥҥа дьиҥнээхтик баар эбит”, — диэн сонньуйбута.
Мииринэй куоракка Саха сирин салалтата кыттыылаах мунньахха Дмитрий Медведев Чаайандатааҕы гаас баайдаах сирин туһаҕа таһаарыыга болҕомтотун уурбута. Гааһы Кытайга атыыга таһаарар туһунан сорук туруорбута. Биллэрин курдук, 2012 сылтан “Сибиир күүһэ” гаас ситимин тутуута саҕаламмыта.
2011 сыл, сэтинньи 15 күнэ
Дмитрий Медведев иккис сырыыта Арассыыйа Бэрэсидьиэнинэн үлэлиир кэмигэр, 2011 сыллаахха, буолбута.
Хаарбах дьиэттэн көһөрүү үлэтэ хайдах баран иһэрин илэ көрөөрү, Белинскэй уулуссатын 54-с нүөмэрдээх дьиэтигэр олорор ыалга киирэ сылдьыбыта. Дьиэ 1956 сыллаах тутуу буоларын, толору хааччыллыыта суоҕун сөхпүтэ. Онтон сотору саҥа таас дьиэҕэ көһөллөрүн истэн эҕэрдэлээбитэ уонна тэлэбиисэр бэлэхтээбитэ.
Салгыы кини «Хаарбах дьиэттэн көһөрүү” тус сыаллаах бырагыраама чэрчитинэн Дьокуускай куорат Короленко аатынан уулуссатын 19/1 дьиэтигэр үс хостоох кыбартыыраны ылбыт Симоновтар-Барышевтар дьиэ кэргэттэригэр ыалдьыттаабыта. Саҥа дьиэҕэ Егор Борисов арыалдьыттаах киирэн сэһэргэспитэ, чэйдээбитэ.
Киин куораттан Аҕа баһылык өрүс нөҥүө тиийэн, Беркакит-Томмот-Аллараа Бэстээх хайысханан тардыллыахтаах тимир суол “кыһыл көмүс” утаҕын ууруутугар кыттыыны ылбыта. Халлаан төһө да тымныы буоллар, бэлиэ түгэҥҥэ төбө сыгынньах сылдьан, олохтоох дьон сэҥээриитин ылбыта.
Киэһэ Дмитрий Медведев киин куоракка “Биир ньыгыл Арассыыйа” баартыйа Саха сиринээҕи салаатын салалтатын уонна өйөөччүлэрин кытта көрсөн, олох-дьаһах уонна хомунаалынай хаһаайыстыба кыһалҕаларыгар сүбэ мунньаҕы ыыппыта.
2013 сыл, муус устар 2 күнэ
Бырабыыталыстыба Бэрэссэдээтэлэ Дмитрий Анатольевич бастаан «Бэс Чагда” оҕо киинигэр сылдьыбыта. Тэрилтэ дириэктэрэ Яна Иванова куорпустары кэрийтэрэн көрдөрбүтэ, сылга 3 тыһыынча оҕо үөрэнэрин, сынньанарын сэһэргээбитэ. Ол кэнниттэн Дмитрий Медведев араас улуустартан кэлбит оҕолору кытта көрсөн кэпсэппитэ.
Салгыы Дмитрий Медведев Ил Дархан Егор Борисовтыын Уһук Илин эрэгийиэҥҥэ аан бастакынан аһыллан, үлэтин саҕалаабыт Элбэх өҥөнү оҥорор кииҥҥэ тиийбиттэрэ. Дириэктэр Татьяна Гладкова киин үлэтин билиһиннэрбитэ. Үрдүк сололоох ыалдьыт истэн хайҕаабыта уонна уопутун атын куораттарга тарҕатарыгар сүбэлээбитэ.
Буоларын курдук, Дмитрий Медведев киин куоракка “Биир ньыгыл Арассыыйа” баартыйа Саха сиринээҕи салаатын салалтатын уонна чилиэннэрин кытта көрсүбүтэ. Мунньах кыттыылаахтара Саха сиригэр Интэриниэт сыанатын түһэрэргэ көрдөспүттэрэ. Онуоха Дмитрий Анатольевич “Ростелеком” салалтатын кытта кэпсэтэн, сыананы чэпчэтэргэ сорудахтаабыта.
2016 сыл, от ыйын 6 күнэ
Арассыыйа Бырабыыталыстыбын Бэрэссэдээтэлэ Дмитрий Медведев «Азия оҕолоро» норуоттар икки ардыларынааҕы VI спортивнай оонньуулар үөрүүлээх аһыллыытыгар ыалдьыттаабыта.
Кини Оонньуулар ураты суолталаахтарын, 20 сыл устата тиһигин быспакка ыытыллалларын уонна аан дойдутааҕы Олимпийскай кэмитиэт билиниитин ыларын бэлиэтээн эппитэ.
Олег Николаев, Мария Васильева (СИА) хаартыскалара.
