Дмитрий Медведев Уһук Илиҥҥэ 2 %-наах чэпчэтиилээх ипэтиэкэ туһунан уураахха илии баттаата

Ааптар: 
Бөлөххө киир:

РФ бырабыыталыстыбатын бэрэссэдээтэлэ Дмитрий Медведев Уһук Илин эдэр ыалларыгар чэпчэтиилээх ипэтиэкэ бырагырааматын усулуобуйаларын туһунан уураахха илии баттаата. Бу туһунан ахсынньы 9 күнүгэр вице-премьердэри кытта сүбэ мунньаҕар иһитиннэрдэ.

Докумуоҥҥа олоҕуран, “Уһук Илиҥҥи гектар” бырагырааманан эдэр ыаллар уонна сир учаастактарын ылааччылар Уһук Илиҥҥэ олох намыһах сыллааҕыта 2 бырыһыаннаах ставканан дьиэ атыылаһалларыгар ипэтиэкэнэн кирэдьиити ылар кыахтаахтар.

Санаттахха, Владимир Путин “Уһук Илин федеральнай уокуругун социальнай-экэнэмиичэскэй сайдыыта” судаарыстыба бырагырааматын чэрчитинэн Уһук Илиҥҥэ эдэр ыаллар дьиэ атыылаһалларыгар эбэтэр “Уһук Илин гектар” бырагырааманан сир учаастагар дьиэ тутталларыгар ипэтиэкэнэн дьиэ-уот кирэдьиитин сыллааҕыта 2 быр. таһымҥа диэри бырыһыан ставкатын субсидиялыыры көрөргө сорудахтаабыта.

Саха сирин баһылыга Айсен Николаев кирэдьиит болдьоҕун устата сыллааҕыта 2 бырыһыаннаах бастакы усунуоһа суох ипэтиэкэ ыччакка саамай сытыы кыһалҕаны – дьиэ-уот боппуруоһун быһаарар аналлаах диэн бэлиэтээтэ: “Уһук Илиҥҥэ сыллааҕыта 2 % ипэтиэкэ Уһук Илиҥҥэ эрэгийиэҥҥэ эдэр исписэлиистэри уонна олохтоох ыччаты олохсутар кыаҕы биэриэҕэ”.

Сыллааҕыта Уһук Илиҥҥи 2 бырыһыаннаах кирэдьиити 20 сылга диэри 6 мөлүйүөн солкуобайтан итэҕэһэ суоҕу ылыахха сөп. Бырагырааманан уопсайа 450 млрд солкуобай суумалаах кирэдьиити биэрии олохтонно, ол эбэтэр 147 тыһыынча кирэдьиити. Киһи маннык кирэдьиитинэн биирдэ эрэ туһанар. 2019 сыл ахсынньы 1 күнүттэн 2024 сыл ахсынньы 31 күнүн киллэрэн туран кэмҥэ диэри бэриллибит кирэдьииттэргэ төлөбүр оҥоһуллар.

edersaas.ru

+1
0
+1
0
+1
0
+1
0
+1
0
+1
0
+1
0