Дмитрий Коркин турнирын кыайыылаахтара 2 000 долларынан наҕараадаланыахтара

Кэлэр субуоталаах өрөбүлгэ “Триумф” киин уораҕайыгар Саха АССР, РСФСР, ССРС үтүөлээх тириэньэрэ Дмитрий Коркин кэриэһигэр көҥүл тустууга норуоттар икки ардыларынааҕы турнир ыытыллыаҕа. Онус үбүлүөйдээх турнир бириискэ пуондата 44 тыһыынча долларга тэҥнэһэр. Онон ыйааһыннарыгар бастаабыт бөҕөстөр 2 000, иккис буолбуттар – 1 500 уонна үһүс миэстэҕэ тахсыбыттар 1 000 долларынан биһирэниэхтэрэ. edersaas.ru

Ону сэргэ, урут иһитиннэрбиппит курдук, күрэхтэһии түмүктэниитэ ыйааһыннарыгар бастаабыт бөҕөстөр икки ардыларыгар лотерея оонньонуоҕа. Онно тарбаҕар талааннаах боотур 300 тыһыынча солкуобайы олордон ылыаҕа. Бааттаах көрөөччүлэр эмиэ дьиэлэригэр илии тутуурдаах, өттүк харалаах барыахтара. “Фортуна” кэнсиэртиир ааҕыныстыба киирии билиэттэринэн сыаналаах бириистэри – булт сааларын, дьахтар саҕынньаҕын, навигатордары, iPhone 7 төлөпүөнү, о.д.а. — оонньотуоҕа. Күрэхтэһии бастакы күнүн саамай бааттаах көрөөччүтүгэр “УАЗ-фермер” массыына күлүүһэ туттарыллыаҕа. Иккис күн дьоллооҕо сабыс-саҥа “Ниссан-Алмера” уруулугар олорон дьиэлиэҕэ. Киирии билиэттэр “Центральнай”, “Синема-центр”, “ASIA”, “Триумф” СК каассаларыгар атыыга таҕыстылар. Сыаналара, олорор миэстэтиттэн көрөн — 500, 800 уонна 1 000 солкубай.

Роман Попов, “Саха сирэ” хаһыат, edersaas.ru