Дмитрий Ходулов аатынан култуура-сынньалаҥ киинэ быйыл тутуллан бүтүөхтээх
ССРС норуодунай артыыһа Дмитрий Ходулов аатынан элбэх өрүттээх култуура-сынньалаҥ киинин дьиэтэ Майа сэлиэнньэтигэр 2020 сыл ахсынньы бүтэһигэр диэри тутуллан бүтэриллиэҕэ.
edersaas.ru
Эбийиэк өрөспүүбүлүкэ баһылыга Айсен Николаев сорудаҕынан СӨ Кэлэр көлүөнэлэргэ пуондатын «Инники кэскил туһугар» тус сыаллаах бырагырааматын «Өйөһүү» хос бырагырааматын чэрчитинэн, «АЛРОСА» хампаанньа баҕа өттүнэн үбүлээһинин суотугар тутуллар.
Майа сэлиэнньэтигэр тутулла турар эбийиэк сакаасчытынан «Тутуу дириэксийэтэ» ИСФ ХЭУо, генеральнай бэдэрээтчитинэн «Мэҥэ тутуу» тэрилтэ буолаллар. Дириэксийэ сүрүннүүр исписэлииһэ Дмитрий Никитин кэпсээбитинэн, эбийиэк 70 бырыһыана тутулунна: дьиэ көҥдөйө, үрдүн сабыыта бүтэрилиннэ, түннүктэрэ олордулуннулар. Күн бүгүн дьиэ иһигэр ситэрии үлэлэр ыытыллаллар. Бэнтилээссийэ оборудованиета туруоруллар, сылытар систиэмэтин турбалара, радиатордара таҥыллаллар, дьиэ тас өттүн хайар, бүөлүүр үлэлэр толоруллаллар.
Элбэх өрүттээх киин бырайыак быһыытынан икки мэндиэмэннээх, 3 000 квадратнай миэтэрэ иэннээх. Бастакы мэндиэмэҥҥэ 300 миэстэлээх кэнсиэрдиир саала, 100 миэстэлээх аһыыр сир, декорациялар ыскылааттара, вестибюль-фойе, инбэлииттэри үөһээ көтөҕөр тэрил, уопсай аналлаах кэбиниэттэр, хостор – каасса, таҥас туттарар сир о.д.а. баар. Иккис мэндиэмэҥҥэ 50 миэстэлээх киинэ көрө саала, фитнеһынан дьарыктанар саала, сыгынньахтанар сирдэрдээх хореографическай кылаастар тэриллэллэр.
Саҥа дьиэҕэ оройуон эрэ иһинэн буолбакка, өрөспүүбүлүкэ, Бүтүн Арассыыйа таһымнарынан араас култуурунай-маассабай тэрээһиннэр ыытыллыахтара. Манна оройуон олохтоохторугар араас тиэмэлэринэн маастар-кылаастары биэриэхтэрэ, оҕо аймах, ыччат санаалара сытарынан дьарыктаныахтара: үҥкүү куруһуоктарыгар, спортивнай-чэбдигирдэр секцияларга, уо.д.а. Ити курдук, сынньалаҥ комплекса Мэҥэ Хаҥалас оройуонун сэргэ илин эҥээр улуустар олохтоохторо култуурунай-духуобунай сайдыыларын айымньылаах киининэн буолара күүтүллэр.
edersaas.ru