РФ Үөрэҕирии миниистирин бастакы солбуйаачыта Дмитрий Глушко Саха сиригэр үлэтинэн сырыытыгар, Дьокуускай куорат 26 №-дээх оскуолатыгар сырытта.
Кэлэктииби кытары көрсүһүүгэ кини үөрэх дьылын түмүгүнэн кыһа бастыҥ настаабынньык-учууталыгар уонна тахсыылаах үлэлээх эдэр учууталга бириэмийэ аныырын туһунан иһитиннэрдэ. Манна даҕатан эттэххэ, быйыл оскуола 70 сылын туолар. Ол туһунан Фейсбукка оскуола дириэктэрэ Айаан Васильев суруйар.
Дмитрий Глушкону кытары СӨ Үөрэх уонна наука миниистирэ Михаил Сивцев, Дьокуускай куоракка үөрэх управлениетын начаалынньыга Алексей Семенов сырыттылар.
«Ыалдьыттарга анаан оскуолаҕа экскурсия тэрийдибит, «Автономные технологии» хампаанньаҕа оҥоһуллубут робот-дезинфектор хайдах үлэлиирин, үөрэнээччилэр физикаҕа дистанционнай уруокка (ПАК көмөтүнэн) үөрэнэр түгэннэриттэн көрдөрдүбүт. ФГОС ирдэбилинэн уруогу таһынан үлэни, онус архитектурнай-технологическай кылаас холобуругар билиһиннэрдибит. Дириэктэри солбуйааччылар ыраахтан олорон үөрэнии кэмигэр үөрэтэр-методическай үлэни тэрийиилэрин уонна пандемия кэмигэр оҕону иитиигэ туһуланар тэрээһиннэр уратыларын сырдаттылар, оскуола куйаар ситиминэн түмэлин (музейын) көрдөрдүлэр«, — диир Айаан Васильев.
Дмитрий Глушко 26 №-дээх оскуола выпускнига буоларын уонна үлэтин бу оскуолаҕа физкултуура учууталынан саҕалаабытын эппит. «Дмитрий Евгеньевич оскуолаҕа үөрэммит сылларын иһирэхтик аҕынна, үөрэммит кылаастарын көрдө. Биирдэ биология уруогар аҕата туттарбыт алыһарын аҕалбытын, ону уруокка ырытан көрбүттэрин аҕынна», — диэн суруйар оскуола дириэктэрэ.
Ыалдьыттар бу кыһаҕа 40-тан тахса сыл үлэлээбит математика учуутала Антонина Федоровна Глушко көҕүлээһининэн 2007 сыллаахха тэриллибит оскуола устуоруйатын музейын көрбүттэр. Антонина Федоровна бу музей бастакы сэбиэдиссэйэ. Маны сэргэ, оскуола остолобуойун үлэтин билсибиттэр. «Көрсүһүү түмүгэр Дмитрий Евгеньевич оскуола 70 сыллаах үбүлүөйүнэн сибээстээн, үөрэх дьылын түмүгүнэн бастыҥ настаабынньык-учууталга уонна таһаарыылаах үлэлээх эдэр учууталга бириэмийэ аныырын туһунан иһитиннэрдэ«, — диэн бэлиэтиир Васильев.
Хаартыска Фейсбуктан.
+1
+1
+1
+1
+1
+1
+1