Дмитрий Глушко – Н.П. Огарёв аатынан университет ректорын эбээһинэһин толорооччу
Дмитрий Глушко Н.П. Огарёв аатынан Мордовиятааҕы судаарыстыбаннай университет ректорын эбээһинэһин толорооччунан ананна. Туһааннаах бирикээс сэтинньи 8 күнүгэр баттаммыт.
РФ Үөрэҕириитин миниистирэ Сергей Кравцов эҕэрдэ тылы этэригэр Дмитрий Евгеньевич миниистири бастакы солбуйааччынан үлэлиир кэмигэр кини салалтатынан үөрэх улахан бырайыактара олоххо киирбиттэрин, билиитэ, уопута уонна саҥаны олоххо киллэрэр тус көрүүтэ 90 сыллаах устуоруйалаах үрдүк үөрэх кыһатын – балысханнык сайдар университеты дьоһуннаахтык салайыаҕа диэн эппит.
Онтон Дмитрий Глушко бэйэтин тус инстаграмын сирэйигэр: “…Н.П. Огонёров аатынан Мордовиятааҕы судаарыстыбаннай университет – билии, култуура уонна билим аныгы, хамсааһыннаах уонна кыраһыабай киинэ. Саамай сүрүнэ, манна университет да, хас биирдии устудьуон даҕаны сайдарыгар элбэх кыах баар. Манна үөрэнэр – кэскиллээх.
Бүгүн миэхэ 90 сыл устуоруйалаах университет сорҕотунан буоларга уонна уһулуччулаах кэлэктииби кытта үлэлиири итэҕэйдилэр.
Биир идэлээхтэрбэр уонна устудьуоннарга туһалаах буолар туһугар кыахпын барытын ууруоҕум”, — диэн санаатын үллэстибит.
Ыспыраапка: Дмитрий Евгеньевич Глушко 1975 сыллаахха Дьокуускай куоракка төрөөбүтэ. СГУ педагогикаҕа институтун, Арассыыйатааҕы судаарыстыбаннай сулууспа академиятын бүтэрбитэ. Дьокуускай куоракка учууталынан, Дьиэ кэргэн уонна оҕо аймах кэмитиэтин кылаабынай исписэлииһинэн, Ыччат бэлиитикэтин миниистирин бастакы солбуйааччынан, СӨ Билимин уонна профессиональнай үөрэхтээһинин миниистирин бастакы солбуйааччынан, СӨ вице-бэрэсидьиэнинэн, СӨ Профессиональнай үөрэхтээҥҥэ, каадыры бэлэмнээһиҥҥэ уонна аттаран туруорууга миниистиринэн, ВорлдСкиллс эрэгийиэннээҕи ыстандаарты киллэрииигэ дириэктэрин солбуйааччынан үлэлээбитэ, былырыын кулун тутарга РФ Үөрэҕириигэ миниистирин солбуйааччынан, онтон бастакы солбуйааччынан анаммыта. Быйыл ыам ыйыгар атын үлэҕэ көһөрүнэн дуоһунаһыттан босхоломмута иһиллибитэ эрээри, чопчу ханна барара ыйыллыбатаҕа. Бу күннэргэ Мордовиятааҕы судаарыстыбаннай университет ректорын эбээһинэһин толорооччунан ананарын туһунан бирикээскэ илии баттаммыт.
Людмила ПОПОВА, “Саха сирэ” хаһыат, edersaas.ru
Хаартыска: РГ