Муус устар 10 күнүгэр Дьокуускай куорат аан дойдутааҕы улахан тэрээһин киининэн буолла. “Тотальнай дьыктаан” сүрүн былаһааккатынан анаммыт Өксөкүлээх Өлөксөй аатынан Норуоттар доҕордоһууларын дьиэтигэр суруйааччы Дмитрий Глуховскай күнүс 2 чааска бэйэтин айымньытыттан тиэкиһи быһа тардан аахта.
Бу кэнниттэн 2018 сыллаахха тиэкиһи аахпыт суруйааччы Гузель Яхина аахсыйа үөскээбит сириттэн – Новосибирскай куораттан ааҕыаҕа. Онтон өссө артыыс Сергей Безруков, Соҕуруу уонна Хотугу Африка дойдуларыгар анаан ырыаһыт Диана Арбенина ааҕыахтара. Бу курдук аан дойду үрдүнэн араас дойдуларга олорор дьон бу аахсыйаҕа кыттыһыахтара.
Муус устар 10 күнүгэр күнү быһа, 17 чааһы быһа ыытыллар онлайн-марафон буола турар. Бу марафон “Яндекс” хампаанньа өйөбүлүнэн ыытыллар.
Ангелина Васильева, “Саха сирэ” хаһыат, edersaas.ru
Хаартыска: Андрей Сорокин.