Дмитрий Давыдов: «Эрэгийиэннэри өйөөҥ, оччоҕо Арассыыйа киинэтэ тупсуоҕа!”

 Амма улууһуттан сылдьар Дмитрий Давыдов «Пугало» киинэтэ «Кинотавр» сүрүн бирииһин ылла. Иккис олус суолталаах бириис — Дондурей аатынан Арассыыйа киноведтарын уонна кириитиктэрин Гильдиятын бирииһэ эмиэ Саха сирин режиссера ылла.

edersaas.ru

Ону таһынан Эстрада тыйаатырын артыыската, энто-ырыаһыт Валентина Романова-Чыскыырай «Бастыҥ дьахтар оруола» бирииһи ылбыт.

Дмитрий Давыдов жюри бэрэссэдээтэлиттэн Борис Хлебниковтан сүрүн бириис статуэткатын ыларыгар кылгас тыл эттэ:

— Саха киинэтэ Кинотаврга аан маҥнайгытын кыттар — тута сүрүн бирииһи ылбыппытыттан олуһун соһуйдум, бары соһуйдубут! Баҕа санаам судургу — эрэгийэннэри өйөөҥ, оччоҕо Арассыыйа киинэтэ тупсуоҕа! — диэтэ.

Чыскыырай бирииһин дьүүллүүр сүбэ  кыттыылааҕа Владимир Вдовиченков туттарда:

— Биһиги бары биир куолаһынан «Бастыҥ дьахтар оруола» бирииһи “Пугало” киинэ толорооччутугар Валентина Романоваҕа-Чыскыырайга анаатыбыт!

Валентина харда махтал тылын кэнниттэн ырыа ыллаан саалаҕа олороччулары эбии сөхтөрдө, ытыс тыаһынан атаарылынна.

Сүрүн бириис “Пугало” киинэҕэ бэриллиэн сөбө «Кинотавр» саайтыгар тахсар киинэ сыаналааччыларын таблицатыттан эрдэ сэрэйиллэр этэ. Кириитиктэр бары кэриэтэ бу күрэххэ кэлбит 13 киинэттэн Саха сиригэр оҥоһуллубут киинэни ордук чорботон бэлиэтээбиттэрэ.

Егор Карпов, «Саха сирэ» хаһыат, edersaas.ru