Маны аах Успуорт

Дмитрий Чернышенко: Арассыыйа 600 спортсмена 2022 сылга Пекиҥҥэ ыытыллар Олимпийскай оонньууларга бэлэмнэнэр

Арассыыйа Пекиҥҥэ ыытыллар Олимпийскай оонньууларга төһө бэлэмий? Төһө спортсмен бэлэмнэнэрин, ханна баазалар баалларын манна ааҕыҥ.

Арассыыйа 600 спортсмена 2022 сылга Пекиҥҥэ ыытыллар Олимпийскай оонньууларга дойдуларын чиэһин көмүскүөҕэ. Бу туһунан Бырабыыталыстыба Бэрэссэдээтэлин солбуйааччы Дмитрий Чернышенко иһитиннэрдэ.

Билигин Олимпиадаҕа бэлэмнэнии түмүктүүр түһүмэҕэ ыытыллар. 2022 сыл тохсунньуга сүүмэрдэммит хамаанда биллиэҕэ. Кэҥэтиллибит састаапка 600-чэ киһи баар. Бу бастыҥ спортсменнар аан дойдуга саҥа рекордары олохтуохтара уонна дойдубутугар уонунан кыһыл көмүс мэтээли аҕалыахтара диэн эрэнэбин”, — диэтэ Дмитрий Чернышенко.

Дмитрий Чернышенко сүүмэрдиир күрэхтэһиилэр түмүктэринэн хайы-үйэ 261-тэн 218 муҥутуур квотаны кыһыҥҥы Олимпийскай оонньууларга ыллылар диэн эбэн эттэ. Сүүмэрдээһин билигин салҕанар уона 2021/2022 сыллар сезоннарын бүтүүтэ түмүктэниэҕэ. Арассыыйа өссө бобслейга, скелетоҥҥа, хаҥкынан сүүрүүгэ, шорт-треккэ өссө кубуотаны ылар кыахтаах, ону тэҥэ биатлоҥҥа, фристайлга, тарплинтан ыстаныыга уонна хайаттан хайыһардааһыҥҥа – лицензиялары.

“Олимпиада путевкаларын хоккейга уонна керлиҥҥэ эр дьон уонна дьахталлар, ону тэҥэ фигуристарбыт хааччыннылар. Маны сэргэ Пекиҥҥэ муҥутуур көҥүллэммит кубуота биһиги хайыһардьыттарбытыгар буолуоҕа”, — диэн кэпсээтэ вице-премьер.

Бырабыыталыстыба Бэрэссэдээтэлин солбуйааччы маны сэргэ бэлэмнэнэр успуорт эбийиэктэрэ Красноярскай, Хабаровскай, Краснодар уонна Пермь кыраайдарыгар, Иркутскай, Челябинскай, Новосибирскай, Москва уонна Ярославль уобаластарыгар баалларын эттэ.

“Тоҕус бааза хайы-үйэ бэлэм. Кинилэр инфраструктураларын эрчиллиилэр уонна Арассыыйатааҕы уонна норуоттар икки ардыларынааҕы күрэхтэһиилэр кэмнэригэр бэрэбиэркэлэммитэ”, — диэтэ Дмитрий Чернышенко.

“Физическэй култуураны уонна успуорду сайыннарыы” судаарыстыбаннай бырагыраама сыалларыттан биирдэстэринэн национальнай олимпийскай сүүмэрдэммит хамаанда уопсай зачекка үс лидер иһигэр киириитэ буолар. Онон кыһыҥҥы дисциплиналарга спортсменнары эргиччи бэлэмнээһин ыытыллар. Онон 14 тус сыаллаах кэлимсэ бырагыраама торумнанна.

Арассыыйа спортсменнарын билиҥҥи олимпийскай циклгэ аан дойдутааҕы аренаҕа ситиһиилэрэ 2022 сылга Пекиҥҥэ кыһыҥҥы  оонньууларга ситиһиилээхтик кытталларыгар эрэли үөскэтэр. Пекиҥҥэ бэлэмнэрин үрдүк таһымын көрдөрөллөрүн туһугар кинилэргэ ыалдьыахпыт”, — диэтэ вице-премьер.

РФ Бырабыыталыстыбатын саайтыттан

Бэлэмнээтэ Женни Стрюкова

Хаартыска: интернеттэн

 

0
0
Telegram Whatsapp