Дмитрий Бердников Өлүөнэ муостатын тутууга уочараттаах мунньаҕы ыытта

Ааптар: 
Бөлөххө киир:

СӨ Бырабыыталыстыбатын бэрэссэдээтэлин бастакы солбуйааччы э.т.  Дмитрий Бердников ахсынньы 11 күнүгэр видеокэмпириэнсийэ эрэсииминэн Өлүөнэ эбэни туоруур муостаны тутууга оробуочай бөлөх уочараттаах мунньаҕын ыытта.

edersaas.ru

Куйаар ситиминэн ыытыллыбыт мунньахха тустаах министиэристибэлэр уонна биэдэмистибэлэр, муостаны тутар хампаанньалар уонна Мэҥэ Хаҥалас улууһун дьаһалтатын бэрэстэбиитэллэрэ кыттыыны ыллылар.

Мунньаҕы аһарыгар  СӨ Бырабыыталыстыбатын бэрэссэдээтэлин бастакы солбуйааччы э.т.  Дмитрий Бердников  муоста тутуутугар үлэлэһэр оробуочай бөлөх көхтөөх уонна түмүктээх үлэни ыытарын бэлиэтээтэ. Ол курдук, эппиэттээх салайааччы кэккэ тирээн турар боппуруостары тэҥэ, тутуу барыахтаах  сирин учаастактарын тыырыы кыраапыгар сөбүлэсиһии оҥоһуллубутун иһитиннэрдэ.

Урбаан, эргиэн уонна туризм министиэристибэтэ баай-дуол уонна сиргэ сыһыаннаһыы министиэристибэтин кытта муоста тутуллар сиригэр-уотугар киирэр эбийиэктэри чопчулаатылар. Экология, айылҕаны туһаныы уонна өрөспүүбүлүкэ  тыатын хаһаайыстыбатын министиэристибэтэ уонна Ирбэт тоҥу үөрэтэр институт  ирбэт тоҥ усулуобуйатыгар тутууну ыытыыга көстөр боппуруостары үөрэттилэр. Мэҥэ Хаҥалас дьаһалтата СӨ Архитектуратын управлениетын кытта муостаны туоруурга сыһыаннаах суолу-ииһи былааннааһын боппуруостарын быһаарыста.

Баай-дуол уонна Сир сыһыаннаһыытын министиэристибэтэ муоста тутуутугар 75 сир учаастагын биэрии кыраапыгын оҥорууга улахан үлэни ыытта. Кэлэр сыл тохсунньутугар алта сир учаастагын бастакы тыырыы саҕаланыаҕа. Мунньаҕы түмүктүүрүгэр Дмитрий Бердников оробуочай бөлөх тахсыылаах үлэтин бэлиэтээтэ. Кини кэлэр нэдиэлэҕэ тутуу бырайыага Арассыыйа Кылаабынай судаарыстыбаннай эспэртиисэтигэр ыытылларын иһитиннэрдэ. Кэлэр нэдиэлэттэн саҕалаан, оробуочай бөлөх кэккэ суолталаах мунньахтары ыытыаҕа.

    Елена ПОТОЦКАЯ, «Саха сирэ» хаһыат, edersaas.ru

Хаартыска — Мария Васильева, СИА.

+1
0
+1
0
+1
0
+1
0
+1
0
+1
0
+1
0