Дмитрий Бердников: «Дьон өйөбүллээҕин өйдөөтө», — диэн этэр.
СӨ Бырабыыталыстыбатын бэрэссэдээтэлин бастакы солбуйааччы Дмитрий Бердников «Якутия 24» телеханаалга «Актуальное интервью» бырагыраамаҕа Горнай улууһун Бэс Күөлүгэр ойуур баһаарын кэнниттэн чөлүгэр түһэрии үлэтин ыытарга быһаарыылар хайдах ылыллыбыттарын кэпсээтэ. Бу туһунан ulus.media иһитиннэрдэ.
«СӨ Ил Дархана Айсен Николаев быһаарыытынан, Бэс Күөлүгэр ойуур баһаарыттан эмсэҕэлээһини чөлүгэр түһэриигэ үлэни тэрийэн ыытарга суһал ыстаап түргэнник тэриллибитэ. Миэхэ ыстаабы салайар сорудах сүктэриллибитэ. Миэстэтигэр тута быһыыны-майгыны үөрэтии уонна хоромньуну быһаарыы үлэтэ ыытыллыбыта. Биһиги олохтоохтору кытта араас боппуруостары үөрэппиппит, көрбүппүт. Тоҕо диэтэххэ, сорохтор Бэрдьигэстээххэ быстах түһэр пууҥҥа олороллоро. Маны сэргэ, бэйэлэрин баҕа өттүлэринэн көмөлөһөөччүлэр кэлитэлээн барбыттара. Бастакы сыалы-соругу быһаарар үлэҕэ МЧС көмөлөспүтэ«, — диэн кэпсиир Дмитрий Бердников.
Өрөспүүбүлүкэтээҕи суһал ыстаап ити курдук туох баар үлэҕэ ылсыбыта, тэрийбитэ.
«Улахан кэлимсэ үлэ ыытылынна. Манна элбэх киһи кытынна, көмөлөстө. Ол олус үчүгэй. Дьон бэйэлэрэ эрэ туран хаалбатахтарын, кинилэри ким да туора хаалларбатаҕын биллилэр«, — диэн бэлиэтиир.
Бердников этэринэн, сэлиэнньэҕэ саҥа оскуола тутуллуута улахан үөрүүлээх, долгутуулаах буолуоҕа. Маныаха СӨ Ил Дархана Айсен Николаев сорудаҕынан, бу хайысхаҕа үлэ ыытыллар.
«Билигин саамай сүрүнэ, инфраструктураны тэрийиигэ тиһэҕэр тиийэ үлэ ыытыллара, ситэрии-хоторуу наада. Бу былааннар эмиэ толоруллуохтара, туолуохтара дии саныыбын. Оскуола бырайыага билиҥҥи сиригэр-уотугар былааннанар. Бу тутуу Бэс Күөлүгэр дьоһун хардыынан буолуоҕа», — диэн кини эбэн биэрдэ.
+1
+1
+1
+1
+1
+1
+1