Уопсастыба

Дмитрий Бердников: «Бэс Күөлүн олохтоохторун кытта хас биирдии бырайыагы дьүүллэстибит»

Дмитрий Бердников Бэс Күөлүн олохтоохторун кытта хас биирдии бырайыагы дьүүллэспиттэрин туһунан бэлиэтиир.
СӨ Бырабыыталыстыбатын бэрэссэдээтэлин бастакы солбуйааччы Дмитрий Бердников «Якутия 24» телеханаалга Бэс Күөлүгэр ойуур баһаарын кэнниттэн чөлүгэр түһэрии үлэлэрин туһунан кэпсээтэ.
Кини быйыл сайын ойуур уотуттан эмсэҕэлээбит Бэс Күөлүн чөлүгэр түһэриигэ үлэлэһэр суһал ыстаабы салайан кэллэ. Ил Дархан Айсен Николаев манна баһаар уотугар былдьаммыт дьиэлэр оннуларгар кылгас кэм иһигэр саҥалары тута охсорго сорудахтаабыта толоруллубутун этэр. Уопсай быһаарыынан тутар матырыйаалга МХМ-панеллары талбыттар. Дьиэлэрин-уоттарын былдьаппыт дьоҥҥо тута хас да бырайыагы көрдөрбүттэрин туһунан Бырабыыталыстыба бэрэссэдээтэлин солбуйааччы кэпсээтэ.
«Дьиэлэри тутуох иннинэ, сирин-уотун ыраастааһыҥҥа улахан үлэ ыытыллыбыта. Миэстэтин тэҥнээн оҥорбуттара. Чөлүгэр түһэрэр үлэҕэ бырайыактыыр бөлөх тэриллибитэ. Ол бөлөх кылгас кэм иһигэр үлэни  оҥорорго хас да быһаарыытын билиһиннэрбитэ. Хас күн аайы кэриэтэ олохтоохтору кытары көрсүбүппүт, бырайыактары дьүүллэспиппит. Биһиги бырайыак быһаарыыларынан дьиэлэр кылгас кэм иһигэр түргэнник тутуллалларыгар уонна хаачыстыбалаах буолалларыгар усулуобуйаны туруорбуппут», — диэн этэр Дмитрий Бердников.
Түөлбэ олохтоохторо уонна оробуочай бөлөх матырыйаалы оҥорооччулары кытта хас биирдии бырайыагы ымпыгар-чымпыгар тиийэ дьүүллэспиттэр.
«Олохтоохтор матырыйаал экологичнай буоларын туруорсубуттара. Пенобетон блоктартан кыккыраччы аккаастаммыттара. Буруус дьиэлэр тутуллуохтарын баҕарбыттара  эрээри, маннык кылгас кэм иһигэр оннук дьиэлэри тутар хайдах да кыаллыбат. Онон икки өртүттэн сүбэлэһэн баран, МХМ-панельга тохтуурга быһаарыы ылыммыппыт. Куһаҕана суох матырыйаал. Экологичнай, сылааһы тутар», — диэн санаатын үллэһиннэ.
0
0