Дмитрий Бердников Бэс Күөлүгэр бастакы уочаратынан дьиэ-уот тутуллуохтааҕын ыйда

Бүгүн Горнай улууһун Бэс Күөлүгэр ойуур баһаарыттан дьиэлэрэ умайбыт дьоҥҥо көмөнү оҥорууга, баар балаһыанньаны быһаарыыга хамыыһыйа мунньаҕын СӨ Бырабыыталыстыбатын Бэрэссэдээтэлин бастакы солбуйааччы Дмитрий Бердников иилээн-саҕалаан ыытта.

Тустаах хамыыһыйа быһаарыытынан, 40 олорор дьиэ, 15 гараас, 24 баанньык, 15 хоспох, 7 хотон, биир шиномонтаж, биир пилорама умайбыт.

Мунньахха Дмитрий Бердников: «Халлаан тымныйыар диэри эмсэҕэлээбит ыалларга хайаан да саҥа дьиэлэри тутуу бастакы соругунан буолар. Онон бу күннэргэ барытын быһаара охсон, тутуу уонна инфраструктураны чөлүгэр түһэрии үлэлэрэ саҕаланыахтаахтар», — диэн эттэ. Саамай сүрүнэ, гаас ситимэ эмсэҕэлээбэтэх. Онон дьиэлэргэ ситим тиэрдиллэригэр аналлаах «стояктары» туруортуохтара.

Тыа хаһаайыстыбатын өттүгэр этэр буоллахха, оттоммут 100-тэн туонна от былдьаммыт, 300-тэн тахса гектардаах ходуһаны уот салаан ааспыт. Онон 300-тэн тахса ынах сүөһү кыстыгы туруорууругар СӨ Тыатын хаһаайыстыбатын министиэристибэтэ көмөнү оҥоруоҕа.

Александр Тарасов, edersaas.ru