Эдэр дьон силлиэ кэмигэр дьахтары быыһаатылар
Олох-дьаһах

Эдэр дьон силлиэ кэмигэр дьахтары быыһаатылар

Күүстээх тыал кэмигэр араас быһылааҥҥа түбэспит дьон уоскуйан, батсаап бөлөхтөрүгэр суруйан эрэллэр.

edersaas.ru

Ол курдук, Матрена Николаевна Михайлова диэн аатын толору суруйбут куорат олохтооҕо (улуустан кэлэ сылдьара дуу) хайдах быһылааҥҥа түбэспитин суруйан туран: «Батсаап бөлөхтөрүгэр тарҕатыҥ», — диэн көрдөспүт.

«Таҥара баар эбит. Үтүө санаалаах дьон үгүс. Бүгүн 2018  сыл ыам ыйын 28 күнүгэр Орджоникидзе болуоссатыттан чугас П. Алексеев уулуссатынан, 4-с нүөмэрдээх ас маҕаhыынын аттынан баар хаптаhын муосталаах уонна үрдүлээх, тутуллан эрэр дьиэ диэки аҥaар  өттүгэр тимир эркиннээх тротуарынан баран истэхпинэ, эмискэ күүстээх силлиэ түhэн, тыал миигин ол тротуары кытта суулларда. Куттанным аҕай! Кыайан тахсыбакка, тротуар муоста эркин буолан хаалла: «Помогите-е-е», — дии-дии хаhыытыы турдум. Хата, биир эдэр нуучча дьээдьэтэ хаптаhыннары тоҕута тыытан, иhирдьэ киирдэ уонна миигин өйөөн иҥнэҕэр тимир устун (тимир эркинэ муостата курдук буолбута)  үктэнэрбэр көмөлөстө. Онтон хас да  эдэркээн сүүрбэччэлээх саха уолаттара көмөлөстүлэр. Биирдэрэ илиитин уунан миигин (эмиспин, ыйааhыннаахпын) чэпчэки да чэпчэкитик  тардан ылла. Үөрүүбүттэн быыһаабыт дьонум  ааттарын да ыйыппатым. Дьонум бары саҥата суох бара турдулар. БАТСААП НӨҤҮӨ МИИГИН БҮГҮН БЫЫҺААБЫТ ДЬОҤҤО ИСТИҤ МАХТАЛБЫН ТИЭРДЭБИН! Баҕар, бэйэлэрэ түбэhэн ааҕыахтара. Бу ыччаттар олохторо табыллыннын, баҕа санаалара барыта туоллун, ситиhии, дьол, таптал эрэ кинилэри кытта аргыстастын, баай-байылыат олохтоннуннар!

Хата тугум да тостубата, улаханнык көҕөрбөтө. Сирэйбин кып-кыратык өлөрдүм.  Атахпар «царапина» баар. Өссө миигин быыhаабыт дьоҥҥо барҕа махтал!

Доҕоттор, улахан тыалга итинник тротуардарынан сылдьымаҥ, бэйэҕитин харыстаныҥ!»

Матрена Михайлова сэрэтиитин кытта бу батсаапка кэлбит видеоны көрүҥ. Эдэр дьон кыл мүччү итинник тротуартан куотан быыһаннылар дии. Сэрэхтээх буолуҥ. Матрена Николаевнаны быыһаабыт эдэр дьоҥҥо уонна киниэхэ бэйэтигэр эмиэ дьону сэрэппитигэр махтал буоллун!

Елена ПОТОЦКАЯ, «Саха сирэ» хаһыат, edersaas.ru

Видео — батсааптан.

2
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

14 − два =