Сахабыт сирин олоҕо-дьаһаҕа тупсарын туһугар, дьон-сэргэ өйө-санаата, духуобунас, култуура үөрэхтээһин өттүнэн хайа да омуктан итэҕэһэ суох буоларбытыгар сатабыллаах салайааччылар саҥа сүүрээннэри киллэрэн, олохпут тэтимин күүһүрдэн биэрэллэр. Мин холобур оҥостор киһим туһунан кэпсиэхпин баҕарабын.
Ол курдук, М.К. Аммосов аатынан ХИФУ-ну салайа сылдьар, саха норуота киэн тутта ааттыыр мындыр өйдөөх салайааччыта, барыбытыгар үтүө холобур буолар Евгения Исаевна Михайлова «Дьүөгэлиилэр» диэн саҥа сүүрээнин биһирээтим. Кини бу бырайыагы олоххо киллэрбитэ, мин санаабар, олус хайҕаллаах дьыала. Саха сирин дьахталларын кынаттыыр, биир санаанан сомоҕо күүс буолан элбэҕи ситиһэргэ угуйар. Евгения Исаевна өр кэмҥэ салайар үлэҕэ сылдьыбыт киһи буоларын быһыытынан, бүгүҥҥү биһиги өрөспүүбүлүкэбитигэр сытыытык турар кыһалҕалары сыымайдаан, толкуйдаан, дьахтар аймахха үтүө дьыаланы саҕалаатаҕа. Бу сүүрээн салгыы кэлэр көлүөнэҕэ күүс-көмө, өйөбүл буолуо диэн. Евгения Исаевнаҕа күүскэ махтанабын, үтүө дьыалата кэлэр кэнчээри ыччакка, кыргыттарга тирэх буолуоҕа диэммин бигэ эрэллээхпин.
Саха норуота былыр-былыргыттан өбүгэлэрбит үгэстэрин тутуһан, кинилэр илдьэ кэлбит сиэрдэрин-туомнарын салҕаан, бүгүҥҥү балысханнаах олоххо үктэннибит. Саҥа сүүрээннэри олоххо киллэрсэр салайааччылардаах буоламмыт өрөспүүбүлүкэбит аан дойдуга киэҥник биллэн, саха норуотун олоҕо киэҥ эйгэҕэ биһирэннэ. Норуот олоҕо-дьаһаҕа кини хайдах салайааччылардааҕыттан олус улахан тутулуктаах.
Бу сыл атырдьах ыйын 29 күнүгэр Нам улууһугар Евгения Исаевна салайааччылаах «Дьүөгэлиилэр» хамсааһын бэйэтин үлэтин ыытта. Дьону-сэргэни кытта биирдиилээн көрсөн, санаа атастаһан, тустаахха сүбэ биэрэн, сүрдээх үчүгэй тэрээһин буолла. Мин бу түгэҥҥэ Евгения Исаевнаҕа кэнники таһаарбыт «Золотая молодежь Полюса Холода» кинигэни уонна бу сайын тахсыбыт «ЫЛЛЫК УСТУН» диэн хоһооннорум хомуурунньугун бары үтүөнү баҕаран туран бэлэх ууннум.
Түмүкпэр үтүө дьон саҕалааһыннара олоххо киирэн, үүнэр көлүөнэ дьоҥҥо холобур буола турдун диэн баҕа санаабын тиэрдэбин.
Хаартыскаҕа: ааптар уонна Евгения Исаевна Михайлова.
Сивцев Айаал Дмитриевич-Хоту Уолан,
Өймөкөөн улууһуттан төрүттээх эдэр бэйиэт,
кыраайы үөрэтээччи,
Сергей Егоров аатынан бириэмийэ лауреата.