Тускул бу бээтинсэҕэ, ол эбэтэр бүгүн, “Саха сирин үгүс өттүгэр түһүө” диэбит хаара ханнаный? Интэриниэти даҕаны уонна халлааны даҕаны көрдөххө, ып-ыраас. Дьылдьыт, Дьокуускай куорат олохтооҕо Андрей Варламовтыын кыс хаар хаһан түһэрин, дьыл кэлиитин туһунан кэпсэттибит.
-Дьикти күһүн буолла. Баччаҕа диэри халлаан тымныйбакка, сирин тоҥорбокко турар. Этиҥ хойукка диэри эттэ. Кэнчээри от хагдарыйа илик. Хатыҥ сэбирдэҕэ атырдьах ыйыгар бүтүннүү саһаран, балаҕан ыйын “көмүс күһүннээх” көрсөр буоллахпытына, соторутааҕыга диэри күөх турда. Ньургуһун, бэл, сылгы ньургуһуна эмиэ, балаҕан ыйыгар хойуутук тылыннылар. Тураах атырдьах ыйын бүтүүтэ үөрдүһээччи, быйыл саҥа муста сылдьар, сорох үөр өссө төннөн кэллэ быһыылаах. Ити барыта дьогдьоот буоларын битэ.
Уопсайынан, климат сылыйыыта сабыдыаллыыр. Кыһыммыт кылгаан иһэр: сааспыт эрдэлиир, күһүммут хойутуур. Быйыл биир ый кэриҥэ хойутаата. Саас ыам ыйын саҥатыгар 21 кыраадыска диэри итийэ сылдьыбытын өйдүүргүт буолуо.
-Кыс хаарбыт хаһан түһүөй?
-Кэлэн иһэр аата кэлэн иһэр: халлааммыт мантан инньэ сөрүүдүйүө, алтынньыттан сирин тоҥорон, хам ылыа. Балаҕан ыйын бүтүүтэ эбэтэр алтынньы саҥатыгар киин улуустарга эмиэ хаар табыа. Ол эрээри, ууллуо. Тымныйан-хаардаан тыынын таһааран баран, көнүөҕэ. Кыс хаарбыт Бокуруоп, алтынньы 14 күнүн, кэнниттэн 20-с эргин түһэр чинчилээх. Алтынньы сымнаҕас буолуоҕа. Онон, муҥха хойутуоҕа.
-Куска олороҕун дуо?
-Өрүс арыытыгар олоробун эрээри, кус-хаас биллэ илик. Хоту эмиэ тымныйа илигиттэн итиэннэ атын сиринэн суолланна быһыылаах. Кураан, ыраас күннэр турар буоланнар, хаас үөһэнэн ааһарын хаартыскаҕа түһэрэн батсаабынан тарҕаппыттарын көрбүтүм. Кус дойду сиргэ төрөөбөт-үөскээбэт буолла. Хотуттан кэллэҕинэ эрэ. Халлааммыт үүрүөр диэри тоһуйсан көрүөхпүт.
-Оттон куобахпыт, бултаммат даҕаны, эмиэ үөскээбэтэ дии?..
-Оннук. Үөскээбэтэ. Ол аата – сирбит сииктээх, эһиил эмиэ өҥ буолуоҕа.
Василий НИКИФОРОВ, edersaas.ru