Доруобуйа Маны аах

Диспансеризацияҕа бэйэбинэн сылдьан итэҕэйдим

Аан дойдуну атыйахтаах уу курдук аймаан ааспыт ковид уонна ону кытары сибээстээх хааччахтааһыннарынан үгүс киһи поликлиникатын да бырааһыгар тиийбэтэҕэ быданнаата.
Ыраата барбакка эттэххэ, мин доруобуйам туругун көрдөрүммэтэҕим эмиэ икки сыл буолла. Ити диспансеризацияҕа ыҥыралларын соччо-бачча аахайбат курдугум. “Поликлиникалар отчуот сырсыытыгар киһи ахсааныгар наадыйаллар”, “Ол төһө хаачыстыбалаахтык көрөллөр-истэллэр үһү” диэн араас санаалар охсуллан ааһааччылар. Ону сэргэ, туох кистэлэ кэлиэй, үлэлии сылдьар киһиэхэ бириэмэ сырсыыта буоллаҕа. Уруккулуу, сэбиэскэйдии санаабынан, поликлиникаларга уһун унньуктаах уочаракка олорорбун харахпар ойуулаан көрөрүм…

edersaas.ru
Ол да буоллар, бу соторутааҕыта Сайсаар оройуонун олохтоохторун мэдиссиинискэй өҥөнөн хааччыйар Дьокуускай куорат 3 №-дээх балыыһатын килэйбит-халайбыт дьиэтигэр атахтарым барахсаттар сирдээн илтилэр.
Арба, ол иннинэ оҕом көмөтүнэн электроннай уочаракка суруйтарбытым. Онон, тустаах күнү-дьылы анаабыттарыгар сыаллаах-соруктаах киһи быһыытынан тиийбитим. Сэрэх муҥнаах арыый эрдэ кэлбитим, эппит кэбиниэттэрин таһыгар аҕыйах киһи олорор. Онон болдьохтоох чааспар, мүнүүтэбэр миигин диспансеризация бырааһын кэбиниэтигэр ыҥырдылар. Эдэркээн кыыс наадалаах чахчыларын ыйыталаһан, имигэс тарбахтарынан бэчээттээн көмпүүтэригэр киллэрэн кэбистэ. Онтон кэбиниэттэн таһаарбакка, хос-хос уочараттаппакка эрэ тута, ЭКГ-га уһуллулар уонна хаан уопсай анаалыһын ыллылар. Мин соһуйан эрэ хааллым.
Онтон дьахтар консультациятыгар, маммологка атын күҥҥэ толуон биэрдилэр. Ити быраастарга болдьообут күннэригэр, чаастарыгар эмиэ туох да уочарата суох киирэн көрдөрүннүм. Атын да дьон улаханнык ыксаабаттар, уочараты бутуйан айдаарсыбаттар, барыта холкутук¸судургутук ааһар эбит. Манна даҕатан эттэххэ, өссө олох да эдэр сылдьан көрдөрүнэр быраастарбар түбэһэн олус соһуйдум уонна үөрдүм. Барахсаттар, билигин да дьахтар доруобуйатын туһугар үлэлии-хамсыы сылдьаллара үчүгэйин! Дьиҥэр, гинеколог да, акушер да идэтэ аһара чэпчэкитэ суох үлэ эбээт.
Аны көрдөһөммүн, офтальмолог кыыска көрдөрүннүм. Икки харахпар хааппыла кутан баран, икки кэбиниэтинэн араас аппараакка көрдүлэр. Олох сиһилии, кыһаллан туран көрөллөрө үөртэ.
Онтон саамай бүтэһигин терапевт-бырааскар кэлэр эбиккин. Кырдьыгынан эттэххэ, кэлиҥҥи кэмҥэ доруобуйа харыстабылыгар киллэриллибит уларыйыылары, чуолаан быраастар ыарыһаҕы көрбөккө, бириэмэлэрин ордук көмпүүтэргэ аныылларын сөбүлээбэппит. Ол гынан баран, бу сырыыга астынным уонна сөптөөх дьаһал эбит диэн санаам уларыйан таҕыста. Терапевт-быраас көмпүүтэригэр киирэн, эн анаалыстарыҥ түмүктэрин көрөн олорон (барыта эрдэ онно киирэн хаалар эбит), дьэ, барытын быһааран биэрэр, сүбэлиир. Урукку курдук, эн анаалыстарыҥ түмүктэрин кумааҕылар быыстарыгар көрдүү, кыҥастаһа олорбот, барыта экраҥҥа көстө сылдьар. Ону көрө олорон эйигин кытары кэпсэтэригэр, быһаарарыгар да табыгастаах.
Онон, диспансеризацияҕа күҥҥүн-дьылгын улаханнык бараабакка, бэйэҕэр табыгастаах бириэмэнэн сылдьыахха, доруобуйаны көрдөрүнүөххэ сөбүн итэҕэйдим. Диспансеризацияны ыытыы тэрээһинэ чуолкай, үлэһиттэр да эйэҕэстэр-сайаҕастар, ыйыттаххына барытын быһааран биэрэллэр.
Өрөспүүбүлүкэтээҕи 3 №-дээх балыыһа исписэлиистэригэр, салалтатыгар махталбын этэбин.

«Саха сирэ», edersaas.ru саайтка анаан  Мария ФИЛИППОВА

 

1
0
Telegram Whatsapp