Ил Дархан Айсен Николаев Саха АССР төрүттэммитэ 100 сыллаах үбүлүөйдээх тэрээһиннэрин Мариинскай тыйаатыр кэнсиэрэ саҕалаабытын бэлиэтээтэ.
Тыйаатыр саха филармониятын кытта 2007 сылтан бииргэ үлэлиир. Саха сирин автономията төрүттэммит үйэлээх үбүлүөйүн бэлиэтиир сылга дойду аатырбыт тыйаатырын кытта өрөспүүбүлүкэ бииргэ үлэлэспитэ 15-с сыла буолуоҕа.
Кэрэхсэбиллээҕэ, бастакы скрипка бөлөҕөр В.А. Босиков аатынан өрөспүүбүлүкэтээҕи Муусука үрдүкү оскуолатын выпускницата, биир дойдулаахпыт Екатерина Скуруева баар. Кини 2018 с. профессор Лариса Габышева кылааһын бүтэрбит уонна Мариинскай тыйаатыр оркестрыгар үлэҕэ киирбит.
Филармонияны кытта ыкса сибээстээхтик үлэлэһэр буолан, Мариинскай тыйаатыр мусукааннара уонна артыыстара Саха сиригэр хаста да кэлэн кэнсиэртээтилэр. Филармония камернай кэлэктииптэрэ, ону тэҥэ Symphonica ARTica государственнай струннай оркестр мусукааннара хас сыл аайы Мариинскай тыйаатыр сыанатыгар тахсан оонньууллар.
Саха АССР 100 сыллаах үбүлүөйүнэн сибээстээн, 2022 сылга Санкт- Петербурга Symphonica ARTica кэнсиэрэ тыйаатыр былааныгар киирбитэ.
Кэнсиэр кэнниттэн Ил Дархан Айсен Николаев Мариинскай тыйаатыр салайааччытыгар уонна оркестр дирижеругар өрөспүүбүлүкэ судаарыстыбаннай наҕараадатын — «Гражданскай килбиэн» бэлиэни Валерий Гергиевка үөрүүлээх быһыыга-майгыга туттарда.
Елена ПОТОЦКАЯ, “Саха сирэ” хаһыат, edersaas.ru
Хаартыска — Андрей Сорокин, СИА.