Тохсунньу 13-20 күннэригэр Суздаль куоракка «Перекресток» диэн ааттаах инклюзивнай үҥкүү иккис бэстибээлэ буолан ааста. Онно Чурапчы улууһун олохтоохторо Александр Собакин уонна кини салайааччыта Айаал Новгородов «Концертная шоу-программа» номинацияҕа I истиэпэннээх лауреат буоллулар.
edersaas.ru
Саша Айаал Прокопьевичка үһүс сылын музыкальнай оскуолаҕа дьарыктанар. Үҥкүүһүттэр «Сайыны көрсүү» диэн сахалыы сиэри-туому көрдөрөр үҥкүүнү туруоран көрдөрбүттэр.
Хореограф, А. Посельская аатынан Дириҥнээҕи оҕо ускуустубатын оскуолатын дириэктэрэ Айаал Новгородов: «Үҥкүүбүтүн дьиҥ сахалыы хамсаныыларга олоҕуран туруорбуппут. Бары кыттааччылар уонна тэрийээччилэр биһиги үҥкүүбүтүн сөбүлээбиттэрин туһунан эттилэр, үгүстэрэ Саша имигэһин уонна муусука тэтимин таайарын бэлиэтээтилэр. Күрэстэһэ кэлбит хамаандалар күүстээхтэр, онон тыҥааһыннаах киирсии буолла. Бырагыраамабытын оҥорорго уонна Суздаль куоракка тиийэрбитигэр көмө буолбут дьоҥҥо махтанабыт», — диэн эттэ.
Саша ийэтэ Клара Собакина: «Саша бу дьарыгы олус сөбүлүүрүн бэлиэтээн, үҥкүүгэ үөрэттэрэ биэрбиппит. Бастаан тэлэбиисэргэ “Танцы” шоуну көтүппэккэ көрөр, үҥкүүһүттэр хас хамсаныыларын хатылыырын бэлиэтии көрбүппүт. 2019 с. Москваҕа аан бастаан инклюзивнай бэстибээлгэ кыттыбыта, онно үҥкүүлүүр партнерын Валентина Новгородованы кытта үһүс миэстэни ылбыттара. Бу бэстибээлгэ бастакы истиэпэннээх лауреат буолбуттарыгар, биллэн турар, олус үөрдүбүт, дьоллоннубут».
Иллэҥ кэмигэр үҥкүүнү таһынан Саша сүүрүүнэн спорт дыбарыаһыгар дьарыктанар, компьютерга оонньуур уонна тэлэбиисэр көрөр. Дьиэтээҕи үлэлэрин туһунан эмиэ умнубат: уу баһар, мас мастыыр, таас чох тиэйэр.
«Саха сирэ» хаһыат, edersaas.ru