Эрэдээксийэбитигэр Чурапчы улууһун Дириҥнээҕи оҕо дьиэтин иитиллээччилэрин ааттарыттан сурук тигинээн кэллэ. Кинилэр олорбут дьиэлэригэр мусуой тэрийэргэ ылсан эрэллэр.
Аҕа дойду Улуу сэриитигэр үгүс оҕо тулаайах хаалбыта. Ити кэмҥэ ыаллар бары кэриэтэ инчэҕэй тирбэҕэ быстыбатынан олорбуттара. Ол иһин судаарыстыба сэрии кэнниттэн оҕо дьиэлэрин аһан, кыраны, кыамматы бэйэтин көрүүтүгэр ылбыта. Чурапчы улууһугар Мындаҕаайыга, Мырылаҕа уонна Дириҥҥэ оҕо дьиэлэрэ аһыллыбыттара.
Дириҥнээҕи оҕо дьиэтигэр отучча сыл устата 579 оҕо иитиллибитэ биллэр. Оччолорго оҕо дьиэлэрин кытары улахан тэрилтэлэр шефтэһэр үтүө үгэстээхтэрэ. Ол тэҥэ, Дириҥҥэ “Якутскгеология” тэрилтэ үлэһиттэрэ шефтэһэн, оҕолорго көмө-тирэх буолбуттара. Үгүс оҕо манна кэлэн үөрэхтэнэн, доҕоттордонон, төрөппүттэрин солбуйар аҕа табаарыстанан, олох киэҥ аартыгар үктэммиттэрэ. Билигин бу оҕолор өрөспүүбүлүкэ араас муннугар тарҕанан олороллор.
Дириҥҥэ билигин икки куорпус тулаайахсыйан турар. Бу маны өрөмүөннээн, нэһилиэк мусуойун кытары холбоон оҕо дьиэтин историятын көрдөрөр, билиһиннэрэр улахан мусуойда тэрийиэҕиҥ диэн биһиги, иитиллээччилэр, этии-бачыым таһаарабыт. Күүспүтүн бары холбоон көччөх гынан көтүппүт дьиэбитин-уоппутун өрө тардыаҕыҥ, кэлэр кэнчээри ыччаппытыгар өйдөбүнньүктэ хаалларыаҕыҥ диэн ыҥырабыт.
САССР тэриллибитэ 10 сылыгар ананан 1932 с. тутуллубут трибунаны (2010 с. Дириҥ орто оскуолатын 19-с выпуһа саҥаттан туппута), саха бастакы романиһа, суруйааччы Эрилик Эристиин өйдөбүнньүгүн, Чурапчы көһөрүллүүтүгэр сылдьыбыт дьоммут мемориальнай дуоскаларын, Дмитрий Лазарев мемориальнай билиитэтин, сопхуос киэн туттар дьонугар туһуламмыт өйдөбүнньүгү, Улуу Кыайыы скверин барытын түмэ тардан, биир улахан комплекс оҥорор киһи бэрт буолуох этэ.
Бу ыҥырыыбытын олохтоох нэһилиэнньэ, оҕо дьиэтин иитиллээччилэрэ, кинилэр ыччаттара ылыныахтара, өйүөхтэрэ диэн эрэнэбит.
Ыспыраапка: Дириҥҥэ оҕо дьиэтэ 1943 с. арыллыбыта. 1993 с. үбүлүөйдээх 50 сылын көрсө бэлиэ сэргэ туруоруллубута. Оҕо дьиэтин историятын билиһиннэрэр, үйэтитэр икки кинигэ бэчээттэнэн таҕыста: биирэ – 2009 сыллаахха, иккиһэ – 2017 сыллаахха.
Дириҥнээҕи оҕо дьиэтин иитиллээччилэрин аатыттан
Мария ОХЛОПКОВА.