Саха сирин норуоттарын муусукатын уонна фольклорун түмэлэ Дьокуускайдааҕы култуура уонна искусство кэллиэһин кытары бүтүн Арассыыйатааҕы аахсыйа чэрчитинэн «Ночь искусств 2019: искусство объединяет» тэрээһини тэрийэллэр. Дьикти түүнү тэрийээччилэр бэлиэтээбиттэринэн, сэтинньи 3 күнүгэр тэрээһин киэһээттэн саҕаланар. Онно түмэл видеоэкспонаттарын көрдөрүөхтээхтэр. Сиһилии түмэл наукаҕа үлэһитэ Мария Корнилова кэпсиир:
—Бастатан туран бу тэрээһиммитигэр күүс-көмө буолбут Дьокуускайдааҕы култуура уонна искусство кэллиэһигэр, Олоҥхо уонна Үүнэр көлүөнэ тыйаатырдарыгар, оҕо искусствотын оскуолатыгар, Сунтаар улууһугар, уо.д.а. махталбытын тиэрдэбит. Кинилэр көмөлөрүнэн бу тэрээһин тэриллэр.
Бастатан туран, ыалдьыттары видеоэкспонаттар күүтэллэр. Видеоэкспонаттар диэн научнай-популярнай, документальнай, музыкальнай, анимационнай киинэлэр уонна видеоуруоктар. Видеоэкспонаттар диэн түмэл эйгэтигэр 10 сыл анараа өртүгэр бу түмэли тэрийбит, билигин музей бочуоттаах дириэктэрэ Аиза Решетникова киллэрбитэ. Манна даҕатан эттэххэ, бастакы видеоэкспонат 2008 сыллаахха уһуллубута. «Якутская свадьба. XIX век» диэн ааттаах научнай-популярнай киинэ. Режиссера, кинематографистары үөрэппит маастар-педагог Сергей Зверев. Онтон 2017 сыллаахха Саха сирин норуоттарын муусукатын уонна фольклорун түмэлин үлэһиттэрин салалтатынан култуура уонна искусство кэллиэһин устудьуоннара «Музыкальные инструменты эвенов и эвенков», «Традиционная одежда эвенов» видеоуруоктары устубуттара. 2018 сыллаахха эмиэ кэллиэс устудьуоннара кыттыгастаах эбээн култууратын тарҕатар Акулина Трайзе-Нулгынэт , уо.д.а. презентациялара оҥоһуллубуттара.
Тэрээһиҥҥэ Саха сирин киинэ устааччыларын уонна култуура кэллиэһин устудьуоннара устубут киинэлэрин дьон-сэргэ көрүөҕэ. Манна былыргы номохтортон, үһүйээннэртэн саҕалаан, оһуохайы, оһуор-бичик туһунан, о.д.а. араас киинэлэр болҕомтону тардыахтара. Оҕолору да бу дьиктилээх күннэртэн матарбаппыт. Кинилэргэ анаан «Кулан Кыыртай бухатыыр» диэн олоҥхонон оҥоһуллубут мульткиинэ көрдөрүллүө. Маны сэргэ, Саха сирин бастакы идэтийбит хормейстера Ф.Баишева уһулуччулаах музыкант Г.Перельштейн туһунан ахтыытынан оҥоһуллубут «Эпистолярный роман» документальнай киинэни көрүөхтэрэ. Бу дьиктилээх түүн ыалдьыттара сценаристары, режиссердары, оператордары, Үүнэр көлүөнэ уонна Олоҥхо тыйаатырын артыыстарын кытары сирэй көрсөн олорон сэһэргэһиэхтэрэ.