Саха сиригэр бэйэни хааччахтаныы эрэсиимэ атырдьах ыйа бүтүөр диэри уһатыллыбыта. Ону тэҥэ, тэрилтэлэр үлэһиттэрин дьиэттэн олорон үлэлиир эрэсиимнэрин эмиэ уһаттылар.
edersaas.ru
Тэрилтэ салалтата үлэ дуогабарыгар суруллубатах да буоллаҕына, үлэһиттэри дьиэттэн олорон үлэлииргэ көһөрүөн сөп. Үлэ хаамыыта бытаарбат, тиэхиньиичэскэй өттүнэн барыта кыаллар буоллаҕына, пандемия кэмигэр дьиэттэн олорон үлэлээһин быдан ордук. Тоҕо диэтэр, биир киһи ыалдьан кэлэн, барыларын сутуйдаҕына, тэрилтэ быстах кэмҥэ сабыллар, үлэ тохтуур кутталланар.
Үлэ уонна социальнай сайдыы министиэристибэтэ иһитиннэрбитинэн, үлэни биэрээччи үлэ усулуобуйата толору суруллубут тустаах бирикээһи таһаарыахтаах. Холобур, үлэ саҕаланар уонна түмүктэнэр бириэмэтэ, үлэ күнүн уһуна, о.д.а. чопчуланыахтаах. Тоҕо диэтэххэ, сынньалаҥ кэмэ, өрөбүл күннэр чопчу быһаарыллыахтаахтар. Үлэһити ууратар буоллахха, Үлэ кодексын нуорматынан бигэргэтиллибит дуогабарга олоҕуран эрэ, уһулуохха сөп. Быстах кэмҥэ дьиэҕэ олорон үлэлээһин уонна оннук бастайааннай эрэсиимҥэ көһүү диэн баар буолар.
Пандемия кэмигэр үлэһит уонна үлэни биэрээччи докумуоннарын электроннай көрүҥүнэн ыытыһаллара көҥүллэнэр, ону кэлин кумааҕыга көһөрүөхтэрин сөп.
Саамай сүрүнэ, дьиэттэн олорон үлэлииргэ хамнас толору төлөнүөхтээх.
Бэс ыйын 16 күнүгэр Госдуумаҕа тэйиччиттэн уонна дьиэттэн олорон үлэ ымпыгын-чымпыгын чуолкайдыыр сокуон барылын оҥорон киллэрбиттэрэ. Ону Госдуума бастакы ааҕыыга ылыммыта. Манна үлэһит сынньанар кэмэ, “офлайн буолар бырааба” чуолкайданна. Докумуон үлэһит ороскуотун толуйары эмиэ быһаарар, кини быраабын көмүскүүр.
Сокуон барылын Федерация Сэбиэтин бэрэссэдээтэлэ Валентина Матвиенко оҥорон киллэрбитэ, кини урут тэрилтэҕэ уонна дьиэҕэ олорон үлэни сокуонунан бигэргэтэр наадалааҕын туһунан этэн турар. Холобур, үлэһит уонна үлэни биэрээччи сыһыаннарын, үлэ бириэмэтин, сынньалаҥы ааҕыыны, «больничнай» лиистэри оҥорторууну, анал таҥаһы тиктэриини, о.д.а. боппуруостары быһаарыахха наада.
Билиҥҥи туругунан, дойду үрдүнэн 6 мөлүйүөнтэн тахса киһи дьиэтиттэн олорон үлэлиир. Бу эрэсиим өссө салҕанар чинчилээх.
Ангелина Васильева, «Саха сирэ» хаһыат, edersaas.ru
Хаартыска: интэриниэттэн.