Сунтаар улууһугар 39 саастаах киһи дьиэтин аанын түүн ким эрэ кэлэн ытыалаабыт. Ол туһунан полицияҕа эрийэн эппит.
Полицейскайдар сааланыыга уорбаланааччыны туппуттар — хочуолунайга үлэлиир 21 саастаах уол эбит.
Барыллаан быһаарыынан, ити иннинэ бу дьон кулуупка кыыһырсан баран, охсуһа сыспыттар.
Ол кэнниттэн уол итирэн баран, дьиэтиттэн 12 калибрдаах ТОЗ-34 булт саатын ылан, ити айдаарсыбыт киһитин дьиэтигэр барбыт. Уонна күүлэҕэ тиийэн, ааны иккитэ саанан ыппыт.
Дьолго, онтон салгыы дьиэҕэ киирбэккэ, баран хаалбыт.
Сааны уонна ботуруоннары полиция былдьаабыт.
Бу чахчынан РФ Холуобунай кодексатын 213-с ыст. 1 чааһынан, ол эбэтэр, күлүгээннээһин бэлиэтэ баарынан, холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата
+1
+1
+1
+1
+1
+1
+1