“Дьиэлэри суһаллык телекоммуникационнай ситимҥэ холбооһуҥҥа көмөлөһүөҕэ”
Бэҕэһээ “Эдэр саас” саайтка “Бырабыыталыстыба саҥа тутуулары телекоммуникация ситимигэр холбооһун бэрээдэгин бигэргэттэ” диэн матырыйаал тахсыбыта. Онно дьиэни тутан үлэҕэ киллэрээттэрин кытта сибээс оператордара туох да тардылыга суох кыбартыыралары интэриниэтинэн, төлөпүөн сибээһинэн уонна тэлэбиидэнньэнэн хааччыйыахтарын туһунан этиллибитэ.
Тахсыбыт уураах ис хоһоонунан Саха сирин инновацияҕа, сыыппара сайдыытыгар уонна инфокоммуникационнай технологияларга министиэристибэтиттэн санааларын этэллэригэр ыйытык ыыппыппыт. Тустаах миниистири солбуйааччы Андрей Суслов маннык хоруйу ыытта:
— Саҥа киллэриллэр быраабыла дьиэлэри суһаллык, кэмигэр телекоммуникационнай ситимҥэ холбооһуҥҥа көмөлөһүөҕэ, ол иһигэр тутааччы уонна сибээс оператордарын икки ардыларыгар. Бу иннинэ тутааччылар уонна сибээс оператордара маны холбооһуну тус дуогабардарыгар олоҕуран быһаараллара, ити түмүгэр оҥоһуллар өҥө сороҕор бытаарар уонна хаачыстыбата бэрдэ суох буолар түгэннэрэ бэлиэтэнээччи. РФ Бырабыыталыстыбатын Бэрэссэдээтэлэ Михаил Мишустин таһаарбыт саҥа уурааҕар олоҕуран, телекоммуникационнай ситимнэргэ холбонууга сайаапканы дьиэни тутааччы сибээс операторыгар судаарыстыбаннай өҥө порталынан биэрэр кыахтанна. Уонна, саамай сүрүнэ, туһанааччылар кыбартыыраларыгар көһөн киирээт даҕаны сибээс операторын талар кыахтаналлар.
Бэлэмнээтэ Женни Стрюкова
Хаартыска: интэриниэттэн