![](https://edersaas.ru/wp-content/uploads/2017/12/Zaharova.jpg)
Сыллата Ил Дархан харыйатыгар үөрэҕэр ситиһиилээх, норуоттар икки ардыларынааҕы, Бүтүн Арассыыйатааҕы, өрөспүүбүлүкэ араас куонкурустарыгар, күрэхтэһиилэригэр кыайыылаах, талааннаах 700 оҕо кэлэр. Кинилэртэн биирдэстэрэ — Розалия Захарова. edersaas.ru
Розалия Ньурба улууһун Күндээдэ орто оскуолатын 11-с кылааһын үөрэнээччитэ. Оскуолаҕа киириэҕиттэн, өрүү биэс эрэ сыанаҕа үөрэнэр. Кыһыл көмүс мэтээл иһин туруулаһар. Английскай, нуучча тылларын, математика, обществознание биридимиэттэрин олимпиадаларыгар сыллата кыттар, миэстэлэһэр.
Үөрэҕин таһынан Г.П.Степанова салайар оскуола иһинээҕи “Кэскил” оҕо ансаамбылыгар үҥкүүлүүр. Ол курдук, үҥкүүнэн Финляндияҕа, Кореяҕа баран кэлбиттэр. Бүтүн Арассыыйатааҕы, норуоттар икки ардыларынааҕы куонкурустарга Гран-при үрдүк аатын ылбыттар, лауреат буолбуттар. Оҕолор талааннарын бэлиэтии көрөн, былырыын “Азия оҕолоро” спортивнай оонньуу үөрүүлээх аһыллыытыгар, сабыллыытыгар ыҥыран үҥкүүлэппиттэр. Розалия кыра эрдэҕиттэн ыллыырын сөбүлүүр. Ааспыт сылга улууска ыытыллыбыт англия тылынан ырыа күрэҕэр маҥнайгы миэстэни ылбыт.
Туйгун үөрэнии кистэлэҥэ тугуй диэн ыйыппыппар: “Саамай сүрүнэ – тугу даҕаны аахсыбакка туран, хас күн аайы дьиэҕэ үлэни толоруохха наада”, — диэн кэпсиир. Кини күҥҥэ кырата 2 чааһы уруок ааҕыытыгар ыытар эбит. Ону таһынан, кыралаан кинигэ ааҕар. “Кэлиҥҥи аахпыт кинигэлэрбиттэн ордук сөбүлээбит айымньым Джон Грин “Бумажные города” арамаана буолар. Оттон саамай сөбүлүүр биридимиэтим – алгебра. Формулаҕа туруора-туруора, уугар-хаарбар киирэн туран суоттуурбун туохтааҕар да ордоробун”, — диэн санаатын үллэстэр.
Экономист дуу, финансист дуу буолар былааннаах. Киин куоракка үөрэнэ барар санаалаах эбит да, кэлин саха оҕолоро төннөн кэлиилэрэ үксээбитин кэпсиир. Онон М.К.Аммосов аатынан Хотугулуу-Илиҥҥи федеральнай университекка туттарсар санаалаах.
Розалия “Россия – моя история” түмэлгэ, ХИФУ үөрэтэр-лабораторнай куорпуһугар сылдьыбыттарын иһитиннэрдэ. “Преподавателлэр үрдүк үөрэхтэр тустарынан кэпсээтилэр. Олус элбэх туһалаах сонуну иһиттим. Экэнэмиичэскэй салаа оонньуутугар көхтөөхтүк кыттан, ректор Е.И.Михайлова илии баттааһыннаах сэртипикээт туттум”, — диэн үөрүүтүн үллэстэр.
Людмила ПОПОВА, “Саха сирэ” хаһыат, edersaas.ru