Маны аах Уопсастыба

ДЬИЭ ТУТУУТУН ТУОХТАН САҔАЛЫЫБЫТЫЙ?

Соторутааҥҥа диэри дьиэни туттан саҕалыыргар хас да түһүмэҕинэн элбэх докумуону сүүрэн-көтөн хомуйсарыҥ. Билигин ИЖС (индивидуальное жилищное строительство) докумуонун оҥоруу биллэрдик судургутуйда, икки сүрүн түһүмэхтээх буолла.

Маҥнайгы түһүмэх: ИЖС эбэтэр садтаах дьиэни туттарга эбэтэр реконструкциялыырга былааннанабын диэн иһитиннэриини ыытыы.

Иккис түһүмэх: тутуу эбэтэр реконструкция бүппүтүн туһунан тустаах тэрилтэҕэ иһитиннэриини тиэрдии.

Бу түһүмэхтэри пууннарынан сиһилии быһаарыах.

СИР УЧААСТАГЫН БЫЛААНА

Туттуохтаах дьиэҕит сирэ төһө сөптөөҕүн, табыгастааҕын бы­­һаараргытыгар, бастатан туран, сир учаастагын градостроительнай былаанын (ГПЗУ) сакаас­тыыргытыгар сүбэлиибит. Инникитин кыһалҕаны көрсүбэт туһугар бы­­лааны дьиэ бырайыагын уонна тутуутун саҕалыаххыт иннинэ оҥортороргут ордук.

Дьокуускай куоракка ГПЗУ ыларга сайабылыанньаны www.e-yakutia.ru портал нөҥүө электроннай ньыманан биэрэҕит. Госуслуги (www.gosuslugi.ru) порталга киирэн логиҥҥытын уонна парольгутун суруйан баран электроннай сайабылыанньаны толороҕут. Сайабылыанньаҕа тутуу бары параметрын (дьиэ иэнин, хас этээстээҕин, сир учаастагын кадастровай нүөмэрин, иэнин, аадырыһын уонна туттуллар көрүҥүн) суру­йаҕыт. ГПЗУ докумуона www.e-yakutia.ru порталга тус кэбиниэккитигэр электроннай докумуон быһыытынан кэлиэҕэ. Манна тэрилтэ эппиэттиир үлэһитэ ЭЦП көрүҥүнэн илии баттаабыт буолуоҕа.

Горнай, Нерюнгри, Мииринэй, Чурапчы, Өлүөхүмэ, Өймөкөөн оройуоннарын, маны сэргэ Жатай уокурук уонна Ленскэй куорат олохтоохторо электроннай ньыманан сайабылыанньа биэрэр кыахтаахтар. Сайабылыаньа биэрээччилэр оҥоһуллубут докумуоннарын «Мои документы» киинигэр эбэтэр олохтоох дьаһалтаҕа баран ылыахтарын сөп. Атын оройуоннар градостроительнай былаан сайабылыанньатын «Мои документы» кииҥҥэ баран биэрэллэр. «Мои документы» киин баазатыгар өҥө көрүллэр болдьоҕо – 23 үлэ күнэ.

ТУТУУ САҔАЛАММЫТЫН ТУҺУНАН ИҺИТИННЭРИИ

Дьокуускайга иһитиннэриини www.e-yakutia.ru порталга киирэн электроннай ньыманан ыытыаххытын сөп. Маҥнай сайабылыанньаны толоруҥ. Сайабылыанньаҕа тутар тэрилтэ, сир учаастагын, тутуу эбэтэр реконструкция эбийиэгин, тутуллар дьиэ ойуутун барылын (холобур, топосъемка, ГПЗУ, СПОЗУ (сир учаастагын хайдах былааннаабыккытын схеманан көрдөрүү, маны кадастровай инженердэр оҥороллор) туһунан сибидиэнньэни сиһилии суруйаҕыт.

ТУТУУ БҮППҮТҮН ТУҺУНАН ИҺИТИННЭРИИ

Тутуу бүтээтин кытта доку­муон толоруутун иккис түһүмэҕэр киирэр наада. Иккис түһүмэх диэн тутуу эбэтэр реконструкция бүппүтүн туһунан тустаах тэрилтэҕэ тиэрдии ааттанар. Ол иннинэ тутуллубут дьиэ тиэхиньиичэскэй бы­­лаанын оҥорор кадаастыр инженерин кытта сибээстэһэҕит. Бу өҥөнү чааһынай исписэлиистэр оҥороллор. Хас күнүнэн оҥороллорун, чопчу төлөбүрүн чуолкайдаһан баран бэйэҕитигэр сөптөөх тэрилтэни талан ылыҥ. Иһитиннэриини дьиэ тутуута бүппүтүн кэннэ биир ый иһигэр биэрэ охсоргут ирдэнэр. Дьокуускайга www.e-yakutia.ru. портал нөҥүө электроннай ньыманан толорон ыытыаххытын сөп.

Тутуллубут эбэтэр реконструкцияламмыт эбийиэги уопсай долевой бас билии оҥорорго сөбүлэҥ түһэрсиэххитин эмиэ сөп. Өскөтүн:

– сир учаастага уопсай долевой бас билиигэ баар түгэнигэр;

– арендаҕа биэрэргэ.

Дольщиктар эбэтэр арендатордар ортолоругар сокуоннай саастарын ситэ илик оҕолор баар буоллахтарына, кинилэр сүрүн доку­муоннарын – төрөөбүттэрин туоһулуур сибидиэтэлистибэни – эбии ирдииллэр.

Докумуону электроннай ньыманан кыайан ылбат оройуоннарга иһитиннэриини «Мои документы» кииҥҥэ эбэтэр олохтоох дьаһалтаҕа биэриэххитин сөп.

КОММУНИКАЦИЯҔА ХОЛБОНУУ

Чааһынай дьиэни туттуу эп­­пиэттээх биир сүрүн түһүмэҕинэн коммуникацияҕа холботуу буолар. Өскөтүн таас дьиэҕэ кыбартыыраны атыылаһар буоллахпытына, бэлэм коммуникациялаах дьиэҕэ киирэбит. Оттон чааһынай дьиэҕэ бэйэбит оҥосторбут ирдэнэр.

Чааһынай дьиэҕэ, бастатан туран, уоту-күөһү, онтон гааһы, ол кэннэ биирдэ ууну холботобут. Хайдах холботору, ол туһугар тугу гыныахтаахпытын барытын биир сиртэн, www.e-yakutia.ru. портал электроннай сервиһиттэн, сиһилии билсиэххитин сөп. Сервис нөҥүө чааһынай дьиэҕэ ууну, уоту, гааһы холбуур, киллэрэр тэрилтэлэр саайтарыгар түргэнник киирэр кыахтанаҕыт. Маны таһынан, холботуу, киллэртэрии өҥөтө төһө буоларын анал калькуляторынан ааҕан-суоттаан таһаарар кыахтааххыт.

САДТААХ ДЬИЭ ДЬОН ОЛОРОРУГАР СӨПТӨӨХ ЭБЭТЭР СӨБӨ СУОХ ДИЭН БЫҺААРЫЫ

Садтаах учаастакка баар эбийиэги дьон олорор дьиэтигэр (жилой дом) киллэрэргэ бас билээччи (хаһаайын) маннык ирдэбили тутуһар:

1. Дьон олороругар эрэллээҕин уонна куттала суоҕун бигэргэтэр тиэхиньиичэскэй чинчийиини оҥорторор. Дьокуускайга маннык чинчийиини чааһынай урбаанньыттар уонна биирдиилээн тэрилтэлэр оҥороллор. Чааһынай тэрилтэ анал лиссиэнсийэлээх (көҥүллээх) уонна инженернэй чинчи­йии (изыскание) эйгэтигэр «СРО» чилиэнэ буолуохтаах. Дьокуускайга бүгүҥҥү туругунан тиэхиньиичэскэй чинчийиини оҥорор икки тэрилтэ баар: «РЦТИ» ГУП уонна «Индекс» ХЭУо.

2. Садтаах дьиэ дьон олороллоругар сөптөөҕүнэн ааҕылларыгар үһүс сирэйдэр нотариуһунан бигэргэтиллибит сөбүлэҥнэрин ылар (өскөтүн дьиэҕэ үһүс сирэй бас билээччилэр баар буоллахтарына).

3. Ол кэннэ боломуочунай уоргаҥҥа сайабылыанньаны туттарар. Сайабылыанньаҕа сир учаастагын уонна садтаах (дьон олороругар сөбүлэҥи ылбыт) дьиэ кадастровай нүөмэрин, почтовай аадырыһын уонна бас билээччи электроннай почтатын суруйар.

Ханнык оройуоннарга тутууга сыһыаннаах докумуону электроннай ньыманан биэриэххэ сөбүн e-yakutia.ru судаарыстыбаннай уонна муниципальнай өҥө порталыттан сиһилии билсиэххитин сөп.

«Мои документы»

киин бигэргэммит саайтыттан, https://mfcsakha.ru/moj-dom туһанылынна.

0
0