Бүгүн билиһиннэрэр ыалым — Александровтар. Иван Николаевич Ньурба Мархатыттан, кэргэнэ Екатерина Николаевна Дьааҥыттан төрүттээхтэр.
edersaas.ru, «Саха сирэ» хаһыат
Иван Жатайга 2008 сыллаахха күтүөт буолан кэлбит уонна бу дойдуну сөбүлээн, манна олохсуйарга санаммыттар. Кэргэнин кытта интэриниэт ситимигэр, miRC диэн чатка билсэн, ыал буолбуттар. Уол, кыыс оҕолоохтор. Ыал аҕата Жатайдааҕы техникумҥа маастарынан үлэлиир, сварщиктары үөрэтэр, массыынаны оҥорорго, таҥарга, сыбааркалыырга. Кэтэхтэн үрдүк үөрэххэ үөрэнэ сылдьар. Ийэлэрэ Екатерина — кэрэ аҥаардарга тыҥырахтарын оҥорон, араас өҥүнэн лаахтыыр маастар.
— Бу түөлбэҕэ ыаллар дьиэ туттан киирбиттэрэ саҥа биэс-хас сыл буолла. Манна үксэ кэлиилэр, дьон куораттан, улуустан көһөн кэлэллэр, кэлин саха элбээтэ. Ыаллар септик туруоран, дьиэлэрин толору хааччыллыылаах оҥостоллор.
Өрүс аалларын тутар, өрөмүөннүүр собуот үлэҕэ киирдэҕинэ, сүүһүнэн оробуочай үлэһиттэр газосварщиктар, электриктэр наада буолуохтара. Техникумҥа сиэстэрэлэри, повардары эмиэ үөрэтэллэр. Көрбөт дьон илбийэргэ үөрэнэн, үлэлиир, харчы оҥостор кыахтаналлар. Биир миэстэҕэ 2-3 киһи туттарсар.
Үөрэх кыһатыгар остолобуой, уопсай дьиэ баар. Спордунан дьарыктанарга бары усулуобуйа баар эрээри, оскуолабытыгар саха кылааһа эрэ суох. Оҕолорум саха көрүҥнээхтэр эрээри, нууччалыы саҥараллар. Биһиги оройуоммутугар сотору саҥа оскуола тутуллуохтаах. Жатай куораттан чугас, наадыйдахпыт аайы киирэбит, 109, 111, 107 №-дээх үс оптуобус сарсыарда 8 чаастан киэһэ 22 чааска диэри сылдьар.
Дьон үксэ массыыналаах, сорохтор куоракка киирэн үлэлииллэр. Мин санаабар, үлэттэн толлубат илиилээх-атахтаах киһи, холобур, Жатайга көһөн кэллэҕинэ, ханна баҕарар үлэ булуон сөп. Өрүс флотун хааччыйар салаа таһынан, кыра тэрилтэ элбэх, оскуолаҕа, техникумҥа эдэр үлэһиттэр куруук наадалар.
35 диэри саастаах эдэр ыалга дьиэ атыылаһарга эбэтэр туттарга субсидия көрүлүннэҕинэ, 70-75% судаарыстыба төлүүр. Онно киирсэргэ Жатайга прописката ирдэнэр уонна уочаракка тураҕын. Уочараппыт куорат киэнинээҕэр кыра уонна түргэнник хамсыыр. Сыл ахсын 4-5 ыалы хааччыйаллар. Гаас киллэрэргэ кыаммат ыалга эмиэ көмөлөһөллөр, — диэн кэпсиир Иван Александров.
Марианна Тыртыкова, «Саха сирэ», edersaas.ru