2019 сылга дойду үрдүнэн НДС нолуога 20 бырыһыаҥҥа диэри үрдээн, ону кытта тэҥҥэ бэнсиин, ас-таҥас, өҥө сыаната өрө таҕыста. Сорох эргиэмсиктэр бу балаһыанньаны туһанан, сыананы соруйан хас да бүк үрдэтэллэр.
edersaas.ru
Холобур, саҥа тутуллан бүтэн эрэр дьиэлэргэ, 2018 сылы кытта тэҥнээн көрдөххө, сыана 500 тыһыынча солкуобайтан саҕалаан, мөлүйүөҥҥэ тиийэ эбилиннэ. Ипотека бырыһыана эмиэ 10% куоһаран, кэлэр сайын дьиэ-уот атыыта бытаарара күүтүллэр. Ол эрэн, атыылаһааччы аҕыйаатаҕына, сыана ханна барыай, эмиэ түһүөхтээх дииллэр риэлтордар. Бу ырыынакка сыана биир кэм турбат, араас төрүөтүнэн халбаҥныыр идэлээх.
СӨ тутуутун миниистирэ Павел Аргунов: «НДС ыстаапката үрдээбитэ тутуу матырыйаалын атыылаһарга уонна өҥөнү төлүүргэ быһаччы сабыдыаллыыр. Аны сайын от ыйын 1 күнүттэн өлүүлэһэн тутуунан дьарыктанар хампаанньалар саҥа сокуон ирдэбилинэн, бааҥҥа эскроу счет арыйан, дьиэни тутан бүтэрдэхтэринэ биирдэ харчыны устар кыахтаныахтара. Онон кыра тэрилтэлэр ырыынактан барарга күһэллиэхтэрэ», — диир.
Санатан эттэххэ, өлүүлэһэн тутууга нэһилиэнньэттэн харчы хомуйар тэрилтэлэр 2019 сыл от ыйын 1 күнүттэн бааҥҥа эскроу счет арыйыахтаахтар. Онон, өлүүлэһэн тутууга угуллар үп-харчы тута бааҥҥа түһэн, тутааччы эбэһээтэлистибэтин барытын толорон бүтэриэр диэри тыытыллыбакка «тоҥоруллан» сытыахтаах.
Мантан сылтаан ким улахан эргинэр үптээх, тутууну ыытарга баантан ботуччу суумалаах ылбыт кирэдьиитин сатаан хааччыйар кыахтаах, хаалыаҕа. Итинтэн сиэттэрэн, тутууга тарбахха баттанар монополист хампаанньалар төһө сыананы быспыттарынан атыы барыаҕа. Кинилэр ороскуоттарын, кирэдьииттэрин саба сатаан, биллэн турар, сыананы үрдэтэр эрэ интэриэстээхтэр.
Риэлтордар куорат үгүс олохтоохторо дьиэ-уот боппуруоһун быһаарыммыттара ыраатта, атыылаһааччы улахан аҥаара улуустан киирэн дьиэ ылар диэн этэллэр.
Марианна ТЫРТЫКОВА, «Саха сирэ» хаһыат, edersaas.ru