Тыа хаһаайыстыбатын министиэристибэтэ бааһынай хаһаайыстыба базатыгар дьиэ кэргэн пиэрмэтин сайыннарыы федеральнай бырагыраама гранын кыайыылаахтарын испииһэгин бигэргэттэ.
Бу бырагыраама куонкуруһугар кыттарга 44 бааһынай хаһаайыстыба баһылыга сайаапка түһэрбититтэн, куонкуруска сиппит-хоппут докумуоннаах 33 киһи киллэриллибитэ. Кинилэр бырайыактарын балаҕан ыйын 13 күнүгэр видеокэмпириэнсийэ киэбинэн көмүскээбиттэрэ.
Министиэристибэ иһинэн тэриллибит уон киһилээх хамыыһыйа түмүккэ грант хаһаайыннарынан 14 улуустан 19 бааһынай хаһаайыстыба баһылыгын талан ылла. Бу бырагырааманан быйыл 175 мөл. солк. көрүллүбүтэ, онон грант харчыта хайысхаларынан тутулуктанан биирдии киһиэхэ 15 мөл. солк тиийэ буолуон сөп. Грант үбүгэр тирэҕирэн, 14 дьиэ кэргэн сүөһү иитэр дьиэ пиэрмэни туттуоҕа, атыттар ынах сүөһүнү уонна тыа хаһаайыстыбатын тиэхиньикэтин атыылаһыахтара.
Раиса Сибирякова, «Саха сирэ», edersaas.ru