Дьиэ кэргэн аан дойдутааҕы күнүгэр Национальнай медицинскэй киин Ийэ, оҕо киинигэр саҥа төрөөбүт кырачааннары үөрүүлээх быһыыга-майгыга дьиэлэригэр таһаарыы буолла.
Ыам ыйыгар төрөөбүт уонча кырачааны — аҕыс уолу, биэс кыыһы иннилэригэр кэчигирэппит, киэргэммит, долгуйбут ийэлэр кэккэлээн тураллар. Саалаҕа дьэрэкээн саарыктары, сибэкки дьөрбөлөрүн туппут, кинилэртэн кырата суох долгуйбут, үөрбүт аҕалар, аймахтар бааллар. Субу-субу кыракый оҕолор саҥалара чаҕаарар, кинилэр балтыларын, бырааттарын аан бастаан көрсөргө бэлэмнэнэн кэлбиттэр.
Ийэлэри уонна кырачааннары “Арассыыйа ийэлэрэ” хамсааһын салаатын, СӨ үлэҕэ, социальнай сайдыыга уонна доруобуйа харыстабылын министиэристибэлэрин, ЗАГС управлениетын, Элбэх өҥөнү оҥорор киин, Перинатальнай киин салайааччылара эҕэрдэлээтилэр.
“Арассыыйа ийэлэрэ” хамсааһын салаатын бэрэссэдээтэлэ Прасковья Борисова бэлиэ күнүнэн эҕэрдэлээн туран, саамай сүрүнэ, доруобай, дьоллоох, ситиһиилээх, дьоһун дьону иитэн таһааралларыгар баҕарда. “Ийэ үүтэ тугунан да кэмнэммэт, айылҕа анаабыт бэлэҕэ, оҕо доруобай, олоххо тардыһыылаах буоларын мэктиэтэ. Онон биир саастарыгар диэри эмтэриҥ, дьоллоох оҕо сааһы бэлэхтииргэ кыһаллыҥ”, — диэн эттэ.
Үлэ, социальнай сайдыы миниистирин солбуйааччы Елена Теплякова:
—Оҕо төрүүрэ – бу улахан дьол. Элбэхтик төрөөҥ, дьиэ кэргэн дьолун үксэтиҥ! Олоххо саамай үрдүк дьол, күндү сыаннас – дьиэ кэргэн, чугас дьоно. Дьиэ кэргэн — бу нарын таптал, бэйэ-бэйэҕэ кыһаллыы, истиҥ сыһыан уйата. Онон барыгытын Дьиэ кэргэн аан дойдутааҕы күнүнэн эҕэрдэлиибин! Министиэристибэ аатыттан өрөспүүбүлүкэ, дойду демографическай балаһыанньата сайдарыгар киллэрбит кылааккыт иһин улахан махталы тиэрдэбин, – диэн эттэ.
ЗАГС управлениетын салайааччыта Тамара Кривошапкина эҕэрдэлээн туран, кырачааннарга бастакы докумуоннарын – Төрөөбүтүн туһунан сибидиэтэлистибэлэри туттартаата.
Ангелина Васильева, “Саха сирэ” хаһыат, edersaas.ru
Мария Васильева (СИА) түһэриилэрэ.