Маны аах Экэниэмикэ

«Дьиэ кэргэн ипотекатыгар» уларыйыылар киирдилэр

Арассыыйаҕа чэпчэтиилээх ипотека бырагыраамата былырыын муус устартан олоххо киириэҕиттэн, уопсайа 500 тыһыынчаттан тахса кирэдьиит бэрилиннэ. От ыйын 2 күнүттэн судаарыстыбаттан өйөбүллээх чэпчэтиилээх, ол эбэтэр 6,5%-наах ипотека ставката 7%-ҥа диэри үрдүүрэ күүтүллэр.

Саҥа дьиэттэн кыбартыыра атыыла­һааччыларга аналлаах чэпчэтиилээх ипотека былырыын сэтинньи 1 күнүттэн болдьоҕо түмүктэниэхтээх этэ. Пандемиянан сибээстээн 2021 сыл от ыйын 1 күнүгэр диэри уһатыллыбыта.

Үчүгэй эмиэ куһаҕаннаах дииллэринии, чэпчэтиилээх ипотека ставката намыһах буолан, аны кыбартыыра сыаната балтараа бүк үрдээбитэ. Холобур, Дьокуускай куоракка биир хостоох кыбартыыра сыаната 5 — 5,5 мөлүйүөн солкуобайга тэҥнэстэ. Онон РФ бырабыыталыстыбата туһааннаах бырагырааманы салгыы уһатар дуу, уһаппат дуу туһунан сааһы быһа дьүүллэһэн баран, 2022 сыл от ыйын 1 күнүгэр диэри уһаттылар. Ол гынан

баран, ставка 7%-ҥа диэри үрдээтэ. Эрэгийиэннэргэ кирэдьиит муҥутуур улахан суумата 3 мөлүйүөн солкуобайынан уонна бастакы усунуос 15%-нан урукку курдук оннунан хаалла.

Иккиһинэн, «Дьиэ кэргэн ипотекатын» бырагырааматыгар эмиэ уларыйыылар киирдилэр. Урут туһааннаах кирэдьиитинэн 2018 сыл тохсунньу 1 күнүн кэнниттэн төрөөбүт иккис уонна онтон кэлэр оҕолоох дьиэ кэргэттэр уонна хаһан төрөөбүтүттэн тутулуга суох, инбэлиит оҕолоох ыаллар туһанар бырааптаахтара. Билигин 6%-наах ипотеканы 2018 сыл кэнниттэн бастакы оҕолорун төрөппүт ыаллар ылар кыахтаннылар. Кирэдьиит муҥутуур кээмэйэ эрэгийиэннэргэ 6 мөлүйүөн солкуобай, Москваҕа, Санкт-Петербурга 12 мөлүйүөн солкуобай. Бастакы усунуос – 15%.

Былырыын «Дьиэ кэргэн ипотекатынан» Арассыыйаҕа 80 тыһыынча кэриҥэ кирэдьиит бэриллибитэ. Саҥа усулуобуйа олоххо киирдэҕинэ өссө 100-120 тыһыынча ыал чэпчэтиилээх кирэдьиитинэн туһаныан сөп.

РФ Үбүн министиэристибэтин сыана­лааһынынан, 2021-2024 сылларга бүддьүөттэн чэпчэтиилээх ипотека ставкатын субсидиялааһыҥҥа 40 миллиард, оттон дьиэ кэргэн ипотекатыгар 49 миллиард солкуобай көрүллүөхтээх.

 

edersaas.ru

Хаартыска https://www.pnp.ru

0
0