Маны аах Уопсастыба

Дьиэ кэргэн хапытаалын быйыл туохха туһаныахха сөбүй?

Дьиэ кэргэн хапытаалыгар 2022 сылга киирбит уларыйыыларынан, хапытаал төлөбүрүн  оҕо үөрэнэригэр, ыйдааҕы төлөбүрү ыларга (дьиэ кэргэн дохуота тиийинэн олорор кээмэйтэн кыра буоллаҕына), доруобуйаларынан хааччахтаах оҕолорго соцадаптацияҕа туһаныахха сөп.

edersaas.ru

Сэртипикээти туһанарга биир саамай туһалаах көрүҥүнэн олорор дьиэни-уоту тупсарыы: дьиэ эбэтэр кыбартыыра атыылаһыы уонна ипотеканы төлөөһүн буолар. РФ Үлэҕэ уонна социальнай сайдыыга министиэристибэтин чахчытынан, бырагыраама кыттааччыларын аҥаарыттан ордуктара ити көрүҥү туһанар.

Сиһилии ырытан көрдөххө:

 

Олорор дьиэни атыылаһыы уонна ипотека

Дьиэ кэргэн хапытаалын бэйэ харчытынан эбэтэр ипотеканан кыбартыыра уонна дьиэ атыылаһарга туһаныахха сөп. Үксүгэр сэртипикээти олорор дьиэҕэ кирэдьиит сүрүн иэһин сабарга, рефинансированиеҕа эбэтэр кирэдиит ыларга бастакы угууга (взнос) биэрэллэр. Ол эрээри, бастакы угууга бэйэ үбүн биэрэр ордук, тоҕо  диэтэххэ, баантан бигэргэтиини ыларга кыах бэриллэр.

Дьиэ кэргэн хапытаалын чэпчэтиилээх бырагыраамаларга – Уһук Илиҥҥи, тыа сирэ, дьиэ кэргэнинэн, байыаннай ипотекаларга туһаныахха эмиэ сөп.

Былырыыҥҥыттан ыла олорор дьиэни ипотеканан атыылаһарга эбэтэр тутарга сайабылыанньаны тута бааҥҥа бэриллэр. Наадалаах докумуоннары хомуйуунан бааннар дьарыктаналлар.

 

Дьиэни тутуу уонна саҥардыы

Сэртипикээти куорат таһынааҕы дьиэни  саҥардарга эбэтэр тутарга туһаныахха сөп. Бу үп суотугар  олорор дьиэ учаастагар эрэ буолбакка, саадтаах учаастакка эмиэ тутууну ыытыахха сөп. Ону таһынан  дьиэ кэргэн хапытаалын саадтаах учаастакка  баар дьиэни саҥардарга ыытыахха  эбэтэр  тутуу (саҥардыы) ороскуотун сабыахха сөп.

Дьиэ кэргэн хапытаалын куорат таһынааҕы олорор дьиэни саҥардыыга эбэтэр  тутууга туһаныы маннык усулуобуйалаах: дьиэ “олорор дьиэ” диэн статустаах, сэртипикээт хаһаайына сири бас билэр бырааптаах уонна олорор  дьиэни тутарга көҥүллээх буолуохтаах. Саадтаах учаастакка олорор  дьиэни бэйэ күүһүнэн эбэтэр тутар хампаанньа көмөтүнэн тутуохха сөп.

 

Сир учаастагын атыылаһыы уонна өрөмүөн

Дьиэ кэргэн хапытаалын үбэ олорор дьиэни атыылаһарга (сири буолбатах) ыытыллар. Ол иһин, үбү олорор  дьиэ учаастагар  эбэтэр СНТ (саад-кэммиэрчэскэйэ суох табаарыстыба) сиригэр туһаныахха сөп. Дьиэ кэргэн хапытаалынан учаастагы атыылаһыллыбат.

Дьиэ кэргэн хапытаалын кыбартыыра эбэтэр олорор дьиэ өрөмүөнүгэр туһаныллыбат.

Дьиэ кэргэн хапытаалын туһаныы кэккэ хааччахтардаах. Ону сэртипикээти туһаныах иннинэ билэр ордук. Дьиэ хапытаалын туһанарга сайабылыанньаны оҕо төрөөбүтүн үс сылын иһигэр биэриэххэ наада.

 

Булгуччулаах усулуобуйа

 Дьиэ атыылаһарга дьиэ кэргэн хапытаалын туһанарга булгуччулаах усулуобуйа – атыылаһыллыбыт хамсаабат баайгытыгар оҕолор өлүүлээх буолуохтаахтар.

Надежда ЕГОРОВА, «Саха сирэ» хаһыат, edersaas.ru

1
0
Telegram @edersaas20