РФ Үлэҕэ министиэристибэтэ “Оҕолоох дьиэ кэргэттэргэ ыйдааҕы төлөбүрдэр тустарынан” федеральнай сокуоҥҥа уларытыылары киллэрэр сокуон барылын оҥордо.
edersaas.ru
Билигин бастакы, эбэтэр иккис оҕо төрөөтөҕүнэ (иитэ ыллахтарына) ыйдааҕы төлөбүрү биэрэргэ дьиэ кэргэн орто дохуотугар босуобуйалары эмиэ киллэрэллэр. Бастакы, иккис оҕоҕо төлөбүр бу сылтан киллэриллибитэ. Маннык төлөбүрү ыйдааҕы дохуота 1,5 төгүллээх тиийинэн олоруу алын кээмэйиттэн кыра буоллаҕына эрэ бэриллэр. Маны үгүс дьон сөпсөспөт, ол иһин Үлэ министиэристибэтэ бу бэрээдэги уларытарга этии киллэрдэ.
Онон, маннык босуобуйалар дьиэ кэргэн уопсай дохуотугар ааҕыллыбаттар:
-
Хат буолууга уонна төрөөһүн кэннэ ылар босуобуйа;
-
Хат буолан баран, эрдэ учуокка турбут дьахталлар ылар босуобуйалара;
-
Оҕо төрөөтөҕүнэ биирдэ ылар босуобуйа;
-
Оҕону көрөн олорорго ый аайы ылар босуобуйа;
-
Оҕо босуобуйата;
-
Оҕону ыалга ииттэрэ биэрэргэ биирдэ бэриллэр босуобуйа;
-
Байыаннай сулууспаҕа ыҥырыллан сулууспалыы сылдьар киһи хат кэргэнигэр биирдэ бэриллэр босуобуйа;
-
Байыаннай сулууспаҕа сылдьар киһи оҕотугар ый аайы бэриллэр босуобуйа.
Ону тэҥэ дьиэ кэргэҥҥэ бастакы уонна иккис оҕоҕо ый аайы бэриллэр төлөбүр эмиэ уопсай дохуокка киирсиэ суохтаах. Онон бастакы, иккис оҕолоро төрөөбүт, араас босуобуйаларынан туһанар эдэр ыал судаарыстыбаттан ый аайы көмөнү ылыан сөп.
Сокуон барыла 2019 сыл тохсунньутуттан олоххо киириэн сөп.
Ангелина Васильева, “Саха сирэ” хаһыат, edersaas.ru