Бүгүн – Дьиэ кэргэн, таптал, эрэллээх буолуу күнэ

Бөлөххө киир:

От ыйын 8 күнүгэр Бүтүн Арассыыйатааҕы Дьиэ кэргэн, таптал уонна эрэллээх буолуу күнэ бэлиэтэнэр. Бу күн 2008 сыллаахха дойду үрдүнэн Дьиэ кэргэн сыла биллэриллибитигэр аан бастаан бэлиэтэммитэ.


Бу бырааһынньык дьикти устуоруйалаах эбит. Былыр, 13-с үйэҕэ Муром куоракка Петр диэн кинээс олорбут. Кинээс эмискэ ыараханнык ыалдьыбыт. Ким да сатаан үтүөрдүбэтэх. Биирдэ түүлүгэр “Феврония диэн кыыс эйигин үтүөрдүөҕэ” диэн эппиттэрин итэҕэйэн, оннук ааттаах кыыһы булларан ылар. Кырдьык, Феврония кинини эмтээн үтүөрдэн кэбиһэр. Кинээс үөрүүтүттэн кэргэн ылыах буолар. Ол эрээри боярдар дьадаҥы, аата-суола суох кыыһы тэҥнээбэтэхтэр, күүскэ утарбыттар. Ол иһин кинээс аккаастаан кэбиспит.

Өр-өтөр буолбатах, кинээс иккистээн ыалдьан, өлөр уһукка тиийбит. Февронияны ыҥыртарбытыгар, эмиэ эмтээн үтүөрдүбүт. Бу кэмҥэ кинээс кыыһы ис сүрэҕиттэн таптаан, кэргэн ылбыт. Боярдар ону сөбүлээбэккэ, кинээстэрин утары айдаан тардыбыттар. Петр кэргэнин быраҕыан баҕарбатах, онон иккиэн атах-балай барбыттар. Норуот маны билэн баран, боярдары тохтотолоон, кинээстэрин төттөрү кэлэригэр көрдөспүттэр.

Петрдаах Феврония иккиэн салайар кэмнэригэр элбэх үтүө дьыаланы оҥорбуттара, дьоллоохтук олорбуттара, тапталларын харыстаан, биир да күн арахсыбатахтара. Кырдьан баран, иккиэн биир күн өлүөхпүт диэн бэйэ-бэйэлэригэр тылларын биэрбиттэр. Ол курдук, от ыйын 8 күнүгэр (урукку истиилинэн бэс ыйын 25 күнүгэр) иккиэн биир кэмҥэ күн сириттэн күрэммиттэрэ. Уҥуохтара Муром куоракка Свято-Троицкай таҥара дьиэтигэр  биир хоруопка кистэнэн сытар. Манна саҥа холбоһор эдэр ыаллар кэлэн сүгүрүйэн, көрдөһөн бараллар.

Муром куорат олохтоохторо үйэлээх тапталы, эрэллээх буолууну кэриэстээн, кинилэргэ пааматынньык туруорбуттара.

 edersaas.ru 

+1
0
+1
0
+1
0
+1
0
+1
0
+1
0
+1
0