Төрүт сокуон тула Саха сирин олохтоохторо бэйэлэрин этиилэрин киллэрэллэр, санааларын суруйаллар.
Татьяна Скальникова, СӨ Үлэҕэ уонна социальнай сайдыыга министиэристибэтин иһинэн Кэбээйитээҕи нэһилиэнньэ социальнай көмүскэлин уонна үлэҕэ управлениета” тэрилтэ дьиэ кэргэҥҥэ уонна оҕоҕо социальнай көмө отделениетын педагог-психолога:
— Быйыл Арассыыйа олохтоохторо дойдубут дьоһун суолталаах докумуонун – РФ Төрүт Сокуонун дьылҕатын быһаарыахтара.Бу докумуоҥҥа биһиги олохпутун-дьаһахпытын тупсараары кэккэ көннөрүүлэри киллэрбиттэрэ.
Миэхэ тус бэйэбэр дьиэ кэргэҥҥэ уонна оҕоҕо сыһыаннаах көннөрүүлэр улахан суолталаахтар. 67 ыст. 1 п оҕолор Арассыыйа судаарыстыбаннай бэлиитикэтигэр тумус тутуллаллара ыйыллар. Оттон оҕоҕо дьиэ кэргэнэ диэн кини бу уопсастыбаҕа олоҕу билэригэр саамай кылаабынай тирэҕэ буолара ыйыллар. Дьиэ кэргэҥҥэ эрэ ийэ дойдуга бэриниилээх буолуу, эппиэтинэс уонна аҕа саастаах дьоҥҥо көмөлөһөргө иитэн таһаараллар.
Дьиэ кэргэн статуһун үрдэтии – бу олох сөптөөх быһаарыныы. Ханнык баҕарар судаарыстыба ситиһиитэ – бу, туох-ханнык иннинэ, бигэ тирэхтээх, түмсүүлээх дьиэ кэргэн. Ол иһин дьиэ кэргэҥҥэ атын үтүө хаачыстыбалары сэргэ патриотизм тирэҕэ түстэнэр.
Онон хас биирдии ыал судаарыстыба өйөбүлүн дьиҥнээхтик тус олоҕор билиэхтээх. Бары төрөппүттэр, ордук эдэр ыаллар туруктаах буолуу, судаарыстыба өттүттэн өйөбүл туһунан билиэхтээхтэр, итэҕэйиэхтээхтэр, оттон оҕолорбут – бу Орто дойдуга саамай күндүбүт буоллаҕа.
Судаарыстыба оҕолору дьиэ кэргэҥҥэ дьоһуннук иитэн таһаарыыга маны сокуонугар олохтуура дьоһун суолталаах, оччоҕо кэлин оҕолор бэйэлэрин төрөппүттэрин, аҕа саастаах дьону ытыгылаан көрүөхтэрэ-истиэхтэрэ.
Бу көннөрүүлэри 72 уонна 114 ыстыйаларга киллэрдилэр.
Онон биһиги бука бары Төрүт Сокуону саҥардыыга кыттар кыахтаахпыт. Оччоҕо судаарыстыба дьиэ кэргэҥҥэ болҕомтото күүһүрүөҕэ.
Бэлэмнээтэ Женни СТРЮКОВА, “Саха сирэ” хаһыат
Хаартысканы Т.А.Скальникова ыытта.