Уус Алдан улууһун Бэйдиҥэ сэлиэнньэтигэр оҕо иитэр дьиэ кэргэн олорорун истибиккит буолуо. Тоҕус оҕолоох Саина, Сергей Григорьевтартан ыраахтан олорон (дистанционно) үөрэнии хайдах ааһан эрэрин туоһуластыбыт.
Григорьевтар улахан уоллара үлэһит, иккистэрэ аармыйаҕа ытык иэһин толоро сылдьар, онтон атыттар оскуола үөрэнээччилэрэ. Аны аҕыйах хонугунан үөрэх дьыла түмүктэнээри турар. Онон Саина Егоровна ыраахтан олорон (дистанционно) үөрэнии туһунан туоһуластым.
Ыал ийэтэ сарсыардаттан үөрэх сүпсүлгэнэ диэн этэр: «Эбиэккэ диэри үөрэнэллэр. Күн иккис аҥаарыгар уруоктарын ааҕаллар. Тиэхиньикэни улахаттар бэйэбинээҕэр үчүгэйдик баһылыыллар. Мин сүрүннээн кырабытыгар көмөлөһөбүн. Төлөпүөн интэриниэтинэн холбонор буолан бытаан соҕус. Иккис этээскэ ордук үчүгэйдик хабар. Дьиэбитигэр интэриниэт суох. Остуолба суох диэн киллэрбэтэхтэрэ. Хааччахтааһын эрэсиимэ бүттэҕинэ хайаан даҕаны киллэртэрэр ирдэнэр. Кэлин даҕаны, улахан тымныыларга, бука, маннык ньыманы туһанан үөрэтэллэрэ буолуо.
Уопсайынан, ыраахтан олорон үөрэнэргэ планшет, көмпүүтэр итиэннэ түргэн интэриниэт ирдэнэр эбит. Сороҕор учуутал дуоскаҕа тугу суруйбута төлөпүөнтэн чуолкайдык көстүбэт”, — диэн кэпсиир.
“Бу иннинэ үөрэхтэрин кэнниттэн төлөпүөҥҥэ оонньууллара. Куһаҕан үчүгэйдээх диэбиккэ дылы, үөрэх төлөпүөнүнэн эрэ барар буолан, халыннылар, билигин таһырдьаттан киирбэттэр”, — диир.
Маҥнайгы кылааска үөрэнэр кыыстара төлөпүөнэ суох буолан Саина Егоровна бэйэтин төлөпүөнүн биэрэр эбит. Онтон үөһэ үөрэнэр кыыстара төлөпүөнүн алдьатан кэбиһэн, эбээлэрэ уларсар эбит.
Түргэн интэриниэттээх дьоҥҥо табыгастаах, оҕо бэйэтэ хасыһан, көрөн үөрэнэригэр кыах биэрэр диэн санаатын үллэстэр. Арай, сэттэ оҕобор сэттиэннэригэр батсаапка хас биирдии биридимиэккэ тус-туспа бөлөхтөөх буолан, төлөпүөнүм оргуйан олорор диир.
Хата, харантыын кэмигэр оҕолорум араас куонкурустарга кытыннылар, миэстэлэстилэр, кыттыбыттарын туоһулуур сэртипикээттэри ыыталлар диэн үөрэ кэпсиир.
Тыа сиригэр киһи бэйэ хаһаайыстыбалаах буоллаҕына эрэ табыллар. Күн бүгүн 19 ыанар ынах төрөөн, оҕолор сүөгэйгэ сөтүөлээбиттэр, суораты хото ыймахтыыр буолбуттар. Бары тутуспутунан турунан, саһааннарын үс-түөрт күнүнэн үмүрүппүттэр. Аны оҕуруот олордуутун кэмэ, арассаада бэрийиитин үгэнэ эбит.
Оҕолор иллэҥ бириэмэ көһүннэр эрэ оонньууллар, киэһэтин бары мустан мээчиктииллэр. Ити курдук Григорьевтар дьиэ кэргэн үлэни, үөрэҕи, сынньалаҥы дьүөрэлии туталлар. Сайын күөххэ көччүйээри, сир астаары оҕолор сайыҥҥы сынньалаҥнарын долгуйа кэтэһэллэр.
Людмила ПОПОВА, “Саха сирэ” хаһыат, edersaas.ru