«Дьиэ кэргэн-2019» күрэс бастакы түһүмэҕэ Тааттаҕа ыытыллыа

Бэс ыйын 14-15 күннэригэр Таатта улууһун Ытык Күөл сэлиэнньэтигэр “Дьиэ кэргэн – үгэстэри тута сылдьааччы-2019” куонкурус ыытыллар. Бу сыл аайы буолар “Сыл бастыҥ ыала” өрөспүүбүлүкэтээҕи куонкурус эрэгийиэннээҕи түһүмэҕэ.

Дьиэ кэргэн норуот төрүт үгэстэрин көлүөнэттэн көлүөнэҕэ тиэрдэн, харайааччы, илдьэ сылдьааччы буоларынан, маннык күрэс ыытыллара тоҕоостоох. Манна өссө оҕону иитиигэ норуот педагогикатын ньымаларын аныгы кэмҥэ тутуһар дьиэ кэргэттэри билиһиннэрии буолуохтаах.

Бу күрэскэ хас да көлүөнэ бэрэстэбиитэллээх дьиэ кэргэттэр кыттар кыахтаахтар. Кинилэр ытык Хадаайы сиригэр-уотугар икки күн устата аҕыс түһүмэҕинэн күрэхтэһиэхтэрэ.

Ол курдук, бастаан “дьиэтээҕи үлэлэрин” – бэйэлэрин үгэстэрин, хас да көлүөнэ алтыһыытын көрдөрүөхтэрэ. Түҥ былыргыттан силистээх-мутуктаах  “Төрүччү маһын” оҥорон, көрдөрүүгэ таһаарыахтара. Манна кинилэр ханнык баҕарар матырыйаалы, ньыманы туһаныахтарын сөп.

Туспа былаһааккаларга “Ыал мастарыскыайдара” аһыллан үлэлиэхтэрэ. Манна күрэстэһээччилэр оҕону иитиигэ туһанар этнопедагогика ньымаларын кэпсиэхтэрэ, ас да астыахтара,  сынньаналларын хайдах туһалаахтык атааралларын да билиһиннэриэхтэрэ.

Иккис күнүгэр “визиткаларын” көрдөрүөхтэрэ – манна хайдах билсиспиттэриттэн саҕалаан, сыбаайбаларын, оҕолорун, сөбүлүүр дьарыктарын, о.д.а. айымньылаахтык билиһиннэрэн, талааннарын арыйаллара биһирэнэр.

Түмүккэ, “Өбүгэлэрбит үгэстэрэ” диэн тиэмэнэн былыргы туомнары, үгэстэри (кэргэн кэпсэтии, уруу, оҕо төрөөһүнэ, малааһын, о.д.а.) театрализованнай көрдөрүү быһыытынан арыйыахтара.

Кыайыылаах дьиэ кэргэн ахсынньыга “Сыл бастыҥ ыала-2019” өрөспүүбүлүкэтээҕи күрэскэ кыттар быраабы ылар, 300 тыһ. солкуобайынан наҕараадаланар. 2-с миэстэни ылбыт дьиэ кэргэн миэбэл атыылаһарыгар сертификаты, 3-с миэстэлээх  бытовой тиэхиньикэ ыларыгар сертификаты тутуохтара. Ону тэҥэ, биһирэбил бириискэ тиксибит икки ыал Култуура, духуобунай сайдыы министиэристибэтиттэн, Таатта улууһун дьаһалтатыттан анал бириистэри тутуохтара.

Куонкуруһу СӨ Үлэҕэ, социальнай сайдыыга министиэристибэтэ, култуураҕа, духуобунай сайдыыга министиэристибэтэ, Дьахталлар түмсүүлэрин сойууһа, “Арассыыйа ийэлэрэ” хамсааһын салаата, уо.д.а. тэрийэн ыыталлар.

Ангелина Васильева, “Саха сирэ” хаһыат, edersaas.ru