Дьиэ кэргэҥҥэ биир эмэ киһи тымныйан ыарыйда (температура, сүһүөх кыйар, күөмэйиҥ ыалдьар, тумуу, сыты билбэт буоллаххына) да хайаан да:
— Олорор сиргинэн сыһыарыллыбыт поликлиникаҕар биллэр. Сайаапкаҕын төлөпүөнүнэн https://tm.mzsakha.ru/ сыһыарыынан эбэтэр «Облачная поликлиника» нөҥүө биэриэххин сөп. Ол күн тута балыыһа илииһэ арыллар (больничный).
— Ыарыһаҕы кытта биир дьиэҕэ олорор дьиэ кэргэн чилиэннэрэ бука бары ыарыһах диагноһа биллиэр диэри дьиэҕэ олоруу булгуччулаах эрэсиимигэр киирэллэр.
— Үлэлиир дьон үлэ биэрээччигэ бу туһунан биллэрэллэр. Дьиэттэн быкпакка эрэ хайдах баҕарар сэрэтиэххэ сөп.
— Үлэ биэрээччи үлэһитин дьиэттэн олорон үлэлииргэ тута көһөрөр. Оннук үлэлиир кыаллыбат буоллаҕына, сыллааҕы төлөнөр уоппускаҕа эбэтэр сокуон быһыытынан, икки өттүттэн сөбүлэҥ нөҥүө, төлөммөт уоппускаҕа эмиэ ыытыан сөп. Балыыһа илииһэ (больничный) ыарыһах дьиэ кэргэнин чилиэннэригэр арыллыбат.
— Өскөтүн ыарыһах COVID-19-нан ыалдьыбыт буоллаҕына, дьиэ кэргэн бүтүннүү ыарыһаҕы кытта алтыспыт кэмнэриттэн саҕалаан өссө 14 хонук дьиэҕэ олорорго күһэллэллэр. Балыыһа илииһэ ыарыһаҕы кытта алтыспыт дьоҥҥо Роспотребнадзор изоляцияҕа ыыппыт күнүттэн саҕалаан бэриллэр.
— Өскөтүн ыарыһах COVID-19 ыалдьыбатах буоллаҕына, (көннөрү тымныйыы, тумуу, ОРВИ), анаалыһын түмүгэ биллиэҕиттэн, булгуччулаах дьиэҕэ олоруу эрэсиимэ көтүрүллэр.
— Ыалдьыбыттаах дьиэ кэргэн чилиэнэ үлэтигэр тахсарыгар, ыарыһахха арыллыбыт балыыһа илииһин куопуйатын, устудьуон, оскуола, уһуйаан оҕото буоллаҕына ыспыраапканы көрдөрөр (№ 095/у форма).
Өрөспүүбүлүкэ суһал ыстаабын иһитиннэриитэ.
Бэлэмнээтэ Ирина Ханды, “Саха сирэ” хаһыат, edersaas.ru
Хаартыска: интэриниэт ситимиттэн