Уус Алдан улууһун I Хоро нэһилиэгэр бэрт сэргэх уонна туһалаах тэрээһин ыытылынна диэн Бороҕоннооҕу киин бибилэтиэкэ дириэктэрэ Варвара Окоемова иһитиннэрдэ.
Нэһилиэк олохтоохторугар, оскуола оҕолоругар анаммыт социальнай десаны улуус, нэһилиэк бибилэтиэкэлэрэ уонна улуустааҕы реабилитационнай киин үлэһиттэрэ тэрийбиттэр.
Чөл олохтоох, чэгиэн доруобуйалаах буоларга, бигэ туруктаах дьиэ кэргэн элбиирин туһугар анаммыт тэрээһин болҕомтону улаханнык тардыбыт. «Мин быраабым уонна эбээһинэһим» диэн киһи быраабын билиһиннэрэр бэсиэдэҕэ дьон-сэргэ көхтөөх кыттыыны ылбыт. Ыйытыы биэрээччи, санаа атастаһаачы, ону сэргэ, бибилэтиэкэрдэр В.П.Неустроева, М.А.Сергеева туруорбут босуобуйаларынан, кинигэлэринэн быыстапкаларын сэҥээрэн көрөөччү элбэҕэ маннык тэрээһиҥҥэ дьон наадыйарын туоһутунан буолбутун Варвара Николаевна бэлиэтиир.
Бириэмэни туһалаахтык, көдьүүстээхтик атаарыы үчүгэй өрүттээҕин, оҕо буруйу оҥоруута тахсыбатын туһугар туох үлэни ыытыахха, тэрийиэххэ, о.д.а. ити хайысхаҕа туһуламмыт сэһэргэһиигэ төрөппүттэр, учууталлар, оҕолор санааларын аһаҕастык үллэстибиттэр. Маны сэргэ, «Үөрэнээччи доруобуйата» диэн тиэмэнэн ыытыллыбыт көрсүһүүгэ бэйэ доруобуйатын көрүнүүттэн саҕалаан, аска-үөлгэ, таҥаска-сапка тиийэ дьүүллэһиигэ олус сэргэх кэпсэтии тахсыбыт. “Сатабыл”, “Көмүс иннэ” үөрэнээччилэргэ аналлаах маастар-кылаастар, логопеды, психологы кытта тус көрсүһүү, педиатр-бырааска көрдөрүү улахан сэҥээриини ылбыт. Төрөппүттэр харысхал оҥоро үөрэнэн туохтааҕар да астыммыттар.
Түмүккэ, тэрээһин кыттыылаахтара маннык үлэ тиһиктээхтик ыытыллара наадатын ыйбыттар.
Биһиги корр., «Саха сирэ» хаһыат, edersaas.ru