Өрөспүүбүлүкэҕэ «ПУСК» бырайыак тыа сиригэр үлэтэ суох ыччат ахсаанын аҕыйатарга туһуланар.
Бырайыак СӨ баһылыгын Гранын чэрчитинэн олоххо киллэриллэр уонна улуустарга олохтоох нэһилиэнньэни оробуочай идэлэргэ үөрэтэр соруктаах. «ПУСК» көһө сылдьар үөрэтэр-тутуу кэмбинээтин бырайыага бу сыл кулун тутар 1 күнүттэн Горнай улууһуттан саҕаланна.
Горнай улууһун 32 олохтооҕо улуустарыттан ханна да барбакка олорон үөрэнэллэр уонна «бетонщик», «каменщик» , «сварщик» идэлэри ылыахтара. Ону таһынан, истээччилэргэ бырактыычаскай дьарыктары ыытыахтара итиэннэ үөрэнээччилэргэ идэҕэ хайысхаҕа диагностиканы оҥоруохтара.
«ПУСК» бырайыакка үөрэтии үс түһүмэҕинэн барар. Бастакы түһүмэххэ -– Профессиональнай идэҕэ урутаан үөрэтэр киин (ЦОПП) үөрэтэр платформатыгар онлайн-ньыманан дьарыктаналлар. Иккис уонна үһүс түһүмэхтэргэ муниципальнай оройуоннарга тутуу былаһааккаларыгар үөрэх-быраактыка уонна производственнай быраактыка ыытыллар. Истээччилэр икки ый үөрэнэн баран эксээмэннэрин ситиһиилээхтик туттардахтарына, оробуочай идэни баһылаабыттарын туһунан сибидиэтэлистибэ туттарыллар.
ЦОПП дириэктэрэ Владислав Хабаров:
«Бырайыак оройуоннарга үлэтэ суох ыччат аҕыйыырыгар көмөлөһөрүгэр эрэнэбит. Билигин тыа сирин дьоно дьиэлэриттэн барбакка эрэ үөрэнэллэрин туһугар көһө сылдьар бырактыычаскай үөрэҕи тэрийии хаһааҥҥытааҕар да наадалаах уонна туһалаах. Саха сирин Ил Дархана Айсен Николаев Гранын көмөтүнэн биһиги бырайыакпытын кэҥэтэрбитигэр уонна үс оройуон олохтоохторун хабарбытыгар кыах бэрилиннэ», -– диэн бырайыак сүрүн соругунан муниципальнай оройуоннарга үлэтэ суох дьон ахсаанын аҕыйатыы буоларын тоһоҕолоон бэлиэтиир.
«ПУСК» бырайыак сыл бүтүөр диэри өссө Уус Алдан уонна Амма улуустарыгар үлэлиэҕэ. Нэһилиэнньэ дьарыктаах буолуутугар судаарыстыбаннай кэмитиэт иһитиннэрбитинэн, бырайыакка үөһээ ыйыллыбыт оройуоннарга олорор, 35 диэри саастаах үлэтэ суох ыччат кыттыан сөп.
Сайабалыанньалары биэрэргэ олохтоохтор улуус дьаһалтатыттан ыйыталаһаллар. «ПУСК» бырайыак СӨ Үөрэххэ уонна наукаҕа министиэристибэтин, нэһилиэнньэ дьарыктаах буолуутугар СӨ судаарыстыбаннай кэмитиэтин уонна улуустар дьаһалталарын кытары олоххо киллэриллэр.
8(800)222-41-40, 8(924)460-22-60 ыйытыыларга хоруйу ылыаххытын сөп.
Надежда ЕГОРОВА, «Саха сирэ», edersaas.ru