Дьиэҕитигэр баар гаас тэрилин тустаах исписэлиистэргэ бэрэбиэркэлэппиккит дуо?
СӨ Судаарыстыбаннай тутуу уонна олох-дьаһах надзорун управлениета элбэх кыбартыыралаах дьиэлэргэ баар гаас оборудованиеларын тэхэньиичэскэй туруктара хайдаҕын-тугун кэмигэр бэрэбиэркэлэтэргэ сүбэлиир-амалыыр.
Ирдэбил быһыытынан бэрэбиэркэ сылга биирдэ хайаан да ыытыллыахтаах. Тустаах анал тэрилтэлэр бэрэбиэркэлэрин кэнниттэн гаас оборудованиетыгар тэхэньиичэскэй сыыһа-халты баара билиннэҕинэ, ону тута туоратарга кыһаллыахтаахпыт.
Анал исписэлиистэр тустаах оборудованиелартан гаас быыһылаан тахсарын-тахсыбатын, автоматикалара хайдах-туох үлэлииллэрин бэрэбиэркэлиэхтээхтэр.
«Манна биири өйдүөххэ наада. Буруо тахсар канаалларын сылга, ортотунан, үстэ көрдөрөн ыраастатыллыахтаах. Холобур, оттук сезона саҕаланыан иннинэ, ортолообутун уонна түмүктэммитин кэнниттэн көрдөрөр ордук», — диэн СӨ Судаарыстыбаннай тутуу уонна олох-дьаһах надзорун управлениетын салайааччы Павел Аргунов быһаарар.
Дьиэ иһинээҕи гаас оборудованиеларын көрүү дуогабарын салайар хампаанньалар (УК) тустаах тэрилтэлэри кытта түһэрсиэхтээх, тоҕо диэтэххэ, салайар хампаанньалар дьиэ туругун көрөр-истэр эбээһинэстээхтэр. Онон дьиэҕитигэр үлэлии турар гаас оборудованиеларын тустаах исписэлиистэргэ көрдөрө иликтэр, сөптөөх дьаһаныыны ыларгытыгар сүбэлиибит. «Таҥара сэрэҕи таптыыр» диэн мээнэҕэ эппэтэх буолуохтаахтар.
