Дьиэм чугаһыгар микрофонтан “ураа” хаһыыны кытта кыайыы ырыалара ньиргийэллэрин истэн, бэрт түргэнник таҥнан таһырдьа тахсыбытым, Аҕа дойду Улуу сэриитин кыттыылааҕын эҕэрдэлиир кылгас кэнсиэртэрэ буола турар эбит.
“Тиэргэнинэн ыллыыбыт” аахсыйа иитинэн төрөөбүт дойдуларын туһугар кимиилээхтик киирсибит бэтэрээннэрбитин эҕэрдэлиибит. Сэттэ-аҕыс бөлөх тэҥинэн үлэлиибит. Биһиги бүгүн, уопсайа, үс аадырыстаахпыт. Билигин эрэ Японияны утары сэрии кыттыылааҕа, 166-с туспа зенитнэй-артиллерийскай дивизия састаабыгар суоппарынан сылдьыбыт Архип Иванович Золотуевы эҕэрдэлээтибит. Ыкса ыаллара, кинилэр аттыларыгар бүгүҥҥү эйэлээх, сырдык олох иһин турууласпыт ытык кырдьаҕас бэтэрээн олорорун биллиннэр”, — диэн СӨ Ыччат бэлиитикэтин дьыалаларыгар уонна социальнай коммуникация министиэристибэтин аатыттан кыттар волонтердар өрө күүрүүлээх тылларынан санааларын үллэһиннилэр.
Архип Золотуев Аҕа дойду сэриитин II истипиэннээх уордьанын, “Японияны ылыы иһин”, “Жуков маршал 100 сыла” уонна да атын үбүлүөйдээх сыллар мэтээллэрин, бэлиэлэрин хаһаайына.
Архип Ивановичка “Кыайыы 75 сыла” диэн кыһыл кыраасканан суруллубут УАЗ массыына аттыттан микрофоҥҥа диктор сөҥ куолаһынан үгүс эҕэрдэ тыллара этилиннилэр, кыайыы ырыалара ньиргийдилэр.
Саха биллэр-көстөр, кэскиллээх, чаҕылхай ырыаһыта Константин Степанов: “Эстрада тыйаатырын үлэһиттэрэ Кыайыы 75 сылынан бэтэрээннэри эҕэрдэлиибит, ырыабытын бэлэхтиибит. “День Победы”, “Мин мантан сэриигэ барбытым” уонна биир украинскайдыы ырыаны ыллаатыбыт”, -диэн санаатын үллэстэр.
Оттон бэтэрээн олорор дьиэтин олохтоохторо балконнарын Арассыыйа, Саха сирин былааҕынан, шарынан киэргэтэн бэтэрээҥҥэ, тэрээһин кыттыылаахтарыгар бэйэлэрин эҕэрдэлэрин тиэртилэр.
Санатан эттэххэ, Дьокуускай куоракка “Тиэргэнинэн ыллыыбыт” (“Поем двором”) аахсыйа иитинэн, ыам ыйын 8-9 күннэригэр Аҕа дойду Улуу сэриитин 43 бэтэрээнин эҕэрдэлииллэр. Массыынанан кэлэн, колонкалары холбоон, Кыайыы ырыаларын толороллор. Саха сиригэр тэрээһин эрэгийиэннээҕи сүрүннээччитинэн СӨ Ыччат дьыаларыгар уонна социальнай коммуникацияҕа министиэристибэтэ буолар. Тэрээһини СӨ Култууратын уонна духуобунай сайдыытын министиэристибэтэ, Үлэ уонна социальнай сайдыы министиэристибэтэ, Дьокуускай куорат дьаһалтата бииргэ ыыталлар.
Людмила ПОПОВА, edersaas.ru