Айсен Николаев бүгүн, муус устар 17 күнүгэр, сарсыардааҥҥы иһитиннэриитигэр оҕолору былаһааккаҕа таһаарартан туттунары бэлиэтээн эттэ.
edersaas.ru
❗ Сыстыганнаах ыарыы балаһыанньата кытаатан иһэр. Мииринэйгэ бастакы ыарыһах анаалыһа бигэргэнэн, балыыһаҕа киирдэ. Бу киһи сыстыганнаах дьаҥҥа Москваттан сутуллан кэлбит. Онно төрөппүттэрин кытта олорбут.
❗ Бүлүүгэ ыалдьыбыт дьахтар аны кэргэнэ ыалдьыбыт. Чугас киһи бастакынан сутуллара биллэр.
❗ Алдаҥҥа 4 киһи анаалыстара эбии бигэргэннэ: 3 киһи ырыынакка сылдьыбытын кытта сибээстээх, 1 — балыыһа санитарката.
❗ Алдаҥҥа дьаҥҥа сутуллубут оҕо былаһааккаҕа оонньуу сылдьыбыт оҕону сыһыаран, улахан дьон сутуллубуттар. Онон оҕо ыалдьыбакка эрэ, дьаҥы холкутук сыһыарыан сөп эбит. Былаһааккаҕа оҕолоргутун таһаарбаккытыгар көрдөһөбүт.
❗ Ыарыы саамай сыстыганнаах кэмэ үүннэ. Онон дьиэттэн тахсымаҥ дуу…
❗️ Кутталлаах балаһыанньа — Дьокуускайга. Мархаҕа 3 киһи анаалыһа коронавируһу көрдөрдө. Бу урут ыалдьыбыт дьахтар ыаллыы олорор дьоно. Аэропортан 1 пассажиры, 1 Дьокуускай куорат тэрилтэтигэр үлэлии сылдьар киһини обсерваторга киллэрдилэр.
❗️ Онон Саха сиригэр 47 киһи коронавируска сутуллан ыарыйда. 15 киһи үтүөрэн таҕыста.
✅✅ Баахтанан үлэлиир Газпром үлэһиттэриттэн 20-тэн тахса киһи сыстыганнаах дьаҥҥа сутуллубуттара сабаҕаланар. Бу тэрилтэни кытта үлэ бара турар.
✅ Өссө төгүл тоһоҕолоон бэлиэтиибит: Дьокуускайга балаһыанньа уустук! Мииринэй куоракка эмиэ уустугурда. Онон ханна да тахсыбакка, салгыы дьиэҕитигэр олороргутугар көрдөһөбүт!
… Дьэ, кырдьык, доҕоттор! Дьиэҕэ олорор эрэсиими кытаанахтык тутуһар буоламмыт, ыарыы маассабайдык тарҕаммакка турар. Бастатан туран, бэйэҕит чугас дьоҥҥутун санааҥ. Төһөнөн дьиэттэн тахсыбакка олоробут да, соччонон бэйэбитин харыстыыбыт !
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.