От ыйын 1 күнүгэр хайаан да быыбардыыр уокурукка барыахтааххын диэн буолбатах. Дьиэҕэ олорон, элбэх киһини кытта хантаактаспакка да эрэ, куоластыахха сөп. Киин быыбардыыр кэмитиэт (ЦИК) уонна Роспотребнадзор коронавирус тарҕамматын туһугар, дьиэҕэ куоластааһыҥҥа маннык сүбэлэри биэрдилэр.
edersaas.ru
Дьэ, оччоҕо хайдах гынабытый?
1. Олорор аадырыскыт сыһыарыллыбыт быыбардыыр учаастаккытыгар эрийэн (от ыйын 1 күнүгэр киэһэ 5 чаастан хойутааһына суох), дьиэҕэ куоластыыргытын биллэрэҕит. Эбэтэр “Госуслуги” порталга сайаапка хааллараҕыт.
2. Учаастактан кэллэхтэринэ, ааҥҥын аһан туран, пааспаргын арыйан көрдөрөҕүн. Мааскалаах буоллаххына, кылгас кэмҥэ аллараа түһэрэн, сирэйгин көрдөрөҕүн. Пааспарга баар хаартысканы кытта тэҥнээн көрөллөрүн курдук.
3. Хантаактаспакка эрэ, анал бакыаттаах бүлүтүөнү, сайабылыанньаны, уруучуканы, маасканы, бэрчээккини, антисептик салпыакканы ылан баран, салпыакканан илиигин, ылбыт малларгын сотон ылаҕын. Бэйэҥ уруучукаҕын туһаныаххын сөп.
4. Бүлүтүөнү, сайабылыанньаны толорон баран, аҕалбыт дьааһыктарыгар угаҕын. Учаастак хамыыһыйатын чилиэннэрэ, кэтээн көрөөччүлэр дьиэҕэ киирбэттэр. Дьааһыгы аан аттыгар уураллар, бэйэлэрэ тэйэн биэрэллэр. Анал көстүүмнээх, мааскалаах, бэрчээккилээх сылдьаллар. Сырыы аайы антисептигынан ыстараллар.
5. Барбыттарын кэннэ, илиигин, сирэйгин суунаҕын, маасканы, бэрчээккини бакыакка уган, бөххө быраҕаҕын.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.