Эдьигээн сэлиэнньэтин олохтоохторо эдэр ыал Охлопковтар сыстыганнаах дьаҥ кэмигэр дьиэҕэ олоруу эрэсиимин тутуһан, бириэмэлэрин туһалаахтык атаараллар.
edersaas.ru
Ийэлэрэ Мария Васильевна Култуура отделын исписэлииһэ. Аҕалара Семен Андреевич «Сахааханефтегазсбыт» тутаах үлэһитэ. Охлопковтар «Эдэр ыал» бырагырааманан кэтэх дьиэ тутта сылдьаллар.
Бу күннэргэ Охлопковтар дьиэҕэ олорон, ас арааһын астыырга үөрэннилэр.
Эрдэттэн пельмен, голубцы, кэтилиэт оҥорон, сайын сииллэригэр аһаанан тоҥорбуттар. Кыһыҥҥы таҥастарын сууйан-тараан, абырахтаан, ампаардарыгар таһаарбыттар.
Уруйдаана — 6 кылааска, Айаллаана — 3 кылааска, Айхал 1-кы кылааска тэйиччиттэн олорон эбиэккэ диэри үөрэнэллэр.
Уруок ааҕар кэмнэригэр уу-чуумпу, ким да бэйэ-бэйэтигэр мэһэйдэспэт.
Кыра уол Айхал эдьиийдэрэ дьарыктанар кэмнэригэр тыаһа суох, эрчиллэн ылар.
Уруйдаана элбэх научнай-практическай кэмпириэнсийэлэргэ кыттар, үөрэххэ тардыһыылаах кыысчаан.
Ити курдук, Эдьигээн биир элбэх оҕолоох ыалыгар: «Дьиэҕэ олорор эрэсиими хайдах тутуһаҕыт?» — диэн интэриэһиргээн, кинилэргэ ыраахтан «ыалдьыттаан» аастыбыт.
«Саха сирэ» хаһыат, edersaas.ru анаан Ирина БУРЦЕВА,
Эдьигээн улууһа.
Хаартыска — Охлопковтар дьиэ кэргэннэрин архыыбыттан.