РФ бэрэсидьиэнэ Владимир Путин нэһилиэнньэлээх пууннарга гаас ситимэ хас биирдии дьиэҕэ босхо киириэхтээҕин, манна бары усулуобуйа оҥоһуллуохтааҕын этэн туран, РФ бырабыыталыстыбатыгар, эрэгийиэннэргэ сорудах биэрэн турар. Былырыын бу сыалга 160 млрд солкуобай көрүллүбүт. Бу туһунан РФ бырабыыталыстыбатын бэрэссэдээтэлин солбуйааччы Александр Новак бу нэдиэлэҕэ гаастааһын федеральнай ыстаабын мунньаҕар иһитиннэрдэ.
Санатан суруйдахха, дойду бэрэсидьиэнин сорудаҕынан чааһынай дьиэҕэ гаас ситимэ нэһилиэнньэҕэ босхо тардыллар. Манан билигин федеральнай уонна эрэгийиэннээҕи оператордар, ол эбэтэр гаас эйгэтигэр үлэлиир хампаанньалар дьарыктаналлар. Федеральнай биир кэлим оператор “Газпром” хампаанньа иһитиннэрбитинэн, нэһилиэнньэҕэ гааһы босхо киллэриигэ былырыын 160 млрд солкуобай көрүллүбүт, эрэгийиэннээҕи оператордары кытары барыта 300 дуогабар түһэрсиллибит.
Гааһы киллэриигэ, бастатан туран, кыра дохуоттаах дьоҥҥо-сэргэҕэ болҕомто ууруллуохтаах. Вице-премьер Александр Новак бэлиэтээбитинэн, Арассыыйа үрдүнэн барыта 63 эрэгийиэҥҥэ чэпчэтиилэри оҥоруу систиэмэтэ оҥоһуллубут. Былырыын бу сыалга бүддьүөттэн 2 млрд солкуобай көрүллүбүт.
“Нэһилиэнньэлээх пууннары гаастааһыҥҥа дойду бэрэсидьиэнэ Владимир Путин ыйбыт сорудахтарын толорууга былырыыҥҥыттан ыла “Биир ньыгыл Арассыыйа” баартыйа көмөтүнэн, нормативнай база оҥоһулунна. Туһааннаах биэс федеральнай сокуоҥҥа уларытыылар киирдилэр, ону таһынан бырабыыталыстыба уураахтара таҕыстылар. Нэһилиэнньэ сайаапка биэрэр усулуобуйата барыта оҥоһулунна”, — диэн этэр Александр Новак мунньах кэмигэр.
Дьиэҕэ-уокка гааһы киллэриигэ билигин сайаапканы судаарыстыбаннай өҥөнү оҥорор портал нөҥүө биэриэххэ сөп. Өссө быйылгыттан саҕалаан сайаапка биэрээччи бу порталга туох баар дуогабардары баттаһар, техническэй усулуобуйаны барытын ылар кыахтаныаҕа.
Аграфена КУЗЬМИНА