IT-паарка резиденнэрэ киһи түһээн да көрбөтөх аныгы тэриллэрин айан-тутан таһааран, бар дьону сөхтөрөллөр. Космонавт шлемин курдук кааска кэтэн баран, виртуальнай технология көмөтүнэн тутулла илик саҥа бырайыага эрэ уруһуйдаммыт дьиэ иһигэр киирэн, ис-тас эркинин киинэ курдук көрөр кыахтанныбыт. Ол хайдах үлэлиирин туһунан оҥорон таһаарааччы маннык кэпсиир:
edersaas.ru
Николай Копылов, АСМ «Форма» хампаанньа бэрэстэбиитэлэ:
-Биһиги VR технологияны туттан, информационнай моделированиенан дьарыктанабыт. Көмпүүтэргэ трехмернай көрүҥүнэн дьиэ бырайыагын оҥорон баран чертежтары хостоон, экспертиза ааһарга араас дааннайдары ылан биэрэбит. Виртуальнай эйгэ көмөтүнэн сакаасчыт тутуллуохтаах дьиэ иһигэр киирэн, кээмэйин, иэнин, быһыытын, өҥүн-дьүһүнүн сыаналыыр. Кумааҕыга баар бырайыак тутуллан бүппүт дьиэ курдук көстөр.
Онон бырайыак оҥоһулла сылдьар кэмигэр баар алҕаһы көннөрүөххэ, истиэнэ өҥүн уларытыахха о.д.а. уларытыыны киллэриэххэ сөп. Виртуальнай технология кыаҕын туһанан, бырайыактаммыт дьиэ тутуллуон иннинэ хайдах көстүүлээх буолара ытыска уурбут курдук көстөр, — диэн билиһиннэрэр кини.
Марианна Тыртыкова «Саха сирэ», edersaas.ru